नेपाः छगू विकेटं त्यात

येँ- आइसीसी वल्र्ड क्रिकेट लिग डिभिजन २ अन्तर्गत थौं नामिबियाय् जूगु कासाय् नेपालं नामिबियायात १ विकेटं बुकूगु दु । नकतिनि क्वचाःगु कासाय् नेपालं प्यंगू बल ल्यं दनिबलय् गुंगू विकेटया क्षतिइ १३९ रनया लक्ष्य पूवंकूगु खः ।
कासा त्याकेत बसन्त रेग्मी अन्तिम ओभरय् छगू चौका सहित महत्वपूर्ण ७ रन काःगु खः । रेग्मीं छगू छक्का व निगू चौका सहित अविजित २४ रन दयेकूगु खः । नेपाःया निंतिं दकलय् अप्वः शरद भेषवाकरं २९ रन दयेकूगु खःसा कप्तान पारस खड्कां १९ रन, उपकप्तान ज्ञानेन्द्र मल्लं १५ रन दयेकूगु खः ।
थौं हे जक नेपाःया निंतिं डेब्यू याःम्ह रोहित पौडेलं नं १७ रन दयेकूगु खः। अथेहे सोमपाल कामी १३ रन, डिएस ऐरी ६, करण केसीं ३ व सन्दीप लामिछानें १ रन दयेकूगु खः ।
ब्याटिंग याकूगु खःसा नामिबिया ३४.२ ओभरय् मुक्कं १३८ रन दयेकूगु खः । नेपाःया निंतिं सन्दीप लामिछानें प्यंगू, सोमपाल कामीं स्वंगू व सरद भेसवाकर, पारस खड्का व बसन्त रेग्मी छगू छगू विकेट काःगु खः ।