इंग्ल्याण्ड व स्वीट्जरल्याण्ड विश्वकपय् छनोट, इटालीं प्लेअफ म्हितीगु

एजेन्सी- इंग्ल्याण्ड कतारय् जुइगु विश्वकप २०२२ या निंतिं छनोट जूगु दु । युरोपियन छनोट अन्तर्गत सोमवाः बहनी जूगु कासाय् सान मारिनोयात १०–० गोलया तःधंगु अन्तरं बुकाः इंग्ल्याण्डं विश्वकपय् थाय् दयेकूगु दु । इंग्ल्याण्डया कप्तान ह्यारी केनं याकःचां प्यंगू गोल याःगु खःसा ह्यारी मग्वाएर, इमिल स्मिथ, ट्य्रोन मिङ्स, टामी इब्राहिम व बुकायो साकां छगू छगू गोल याःगु खः ।

सान मारिनोया फिलिप्पो फाब्रीं छगू आत्मघाती गोल याःगु खः । युरोपियन छनोटया मेगु कासाय् स्वीट्जरल्याण्डं बुल्गेरियायात ४–० गोलं बुकाः विश्वकपय् थाय् दयेकल । कासाय् स्वीट्जरल्याण्डया नोह ओकाफोर, रुबेन भर्गास, सेड्रिक इट्टेन व रिमो फ्रुलेरं गोल याःगु खः ।

युरोपकप विजेता इटाली विश्वकप छनोटया निंतिं प्लेअफ म्हितेमालीगु जूगु दु । सोमवाः जूगु कासाय् नर्दन आयरल्याण्डलिसे गोलरहित बराबरी म्हितेवं इटाली विश्वकपय् तप्यंक छनोट जुइमफुगु खः । विश्वकपय् तप्यंक छनोट जुइगु निंतिं इटाली कासा त्याके हे माःगु खः । समूह सीइ च्वंगु इटालीयात लिउने लाकाः शीर्ष थासय् च्वंगु स्वीट्जरल्याण्ड विश्वकपय् छनोट जूगु खः ।

छनोटया मेगु कासाय् विश्वकपय् छनोट जुइधुंकूगु डेनमार्कयात स्कटल्याण्डं बुकल । झ्वःलाक ९ गू कासा त्याकूगु टिम डेनमार्कयात स्कटल्याण्डं २–० गोलं बुकूगु खः । स्कटल्याण्डया जोन सुटर व चे एडम्सं गोल याःगु खः । कासा त्याःसां स्कटल्याण्ड तप्यकं विश्वकपय् छनोट धाःसा जूगु मदु । स्कटल्याण्डं नं विश्वकप छनोटया निंतिं प्लेअफ म्हितीगु जुइ । अथे हे पोल्याण्डयात २–१ गोलं बुकूगु हंगेरी नं विश्वकप छनोटया निंतिं प्लेअफ म्हिती ।

युरोपया दक्वं देय्तय्त झिगू पुचः दयेकाः विश्वकप छनोट कासा म्हिताच्वंगु दु । पुचःया शीर्ष थासय् च्वंगु देय् तप्यंक हे विश्वकपय् छनोट जुइसा निगूगु थासय् च्वंगु देसं नं छनोटया निंतिं प्लेअफ म्हिती ।