स्वनिगलय् आकाझाकां हिया अभाव

येँ – स्वनिगलय् हिया थीथी कम्पोनेन्टया माग छक्वलं अप्वयेवं हिया अभाव शुरु जूगु दु । हिया अत्यधिक माग जुइवं
नेपाल रेडक्रस सोसाइटीं हि दान यायेत हिदातापिंत आह्वान याःगु दु । सामान्य विदाया न्हिं बाहेक मेगु न्हि हि संकलन यायेगु ज्या तसकं म्हो जूगुलिं स्वनिगलय् हिया माग अप्वःगु खँ सोसाइटीं धाःगु दु । हिया अभाव जुइवं सोसाइटीं स्वनिगलय् हि संकलन यायेगु ज्याय् सक्रिय युथ फर ब्लड, क्लब २५, स्वनिगः दुनेया सोसाइटीया जिल्ला शाखा, उपशाखा व मेगु सामाजिक संघसंस्था लिसें स्वय्मसेवी रक्तदातायात हिदानया ज्याझ्वः अप्वयेकेत आह्वान यानागु खँ सोसाइटीया सञ्चार विभागया प्रमुख दिव्यराज पौडेलं कनादिल । सोसाइटीपाखें सञ्चालित रक्तसञ्चार केन्द्रया निर्देशक डा. मनिता राजकर्णीकारया कथं आः न्हिं ३५० पिन्ट हिया माग जुयाच्वंगु दु, माग धाने यायेत केन्द्रयात थाकुयाच्वंगु दु । वय्कलं न्ह्यःने धयादी, ‘म्हीग जक स्वयंसेवी रक्तदातायात आह्वान यानाः हिया माग पूवंका ।’