आत्महत्याय् नेपाः च्यागूगु !

येँ – दँय् न्याद्वः स्वयां अप्वः मनूतय् आत्महत्याया कीर्तिमान सहित नेपाः विश्वय् दकलय् अप्वः आत्महत्या याइगु देय्तय् धलखय् च्यागूगु (८ औं) स्थानय् लाःगु दु । म्हिगः विश्व आत्महत्या विरोधी दिवसया लसताय् थ्व कीर्तिमानया खँ नं सार्वजनिक जूगु खः । नेपालय् लिपांगु इलय् आत्महत्या याइपिनि ल्याः धमाधम अप्वया वनाच्वंगु दु ।

वंगु दँय् जक नेपालय् आत्महत्या याःपिनि ल्याः न्याद्वः स्वयां अप्वः दुगु खः । आत्महत्या यानाः नं बचे जूपिं मनूतय् ल्याः तयेगु खःसा नेपालय् आत्महत्या छगू ग्यानापुगु सामाजिक विकृति जुयाः अप्वया वनाच्वंगु खँ विज्ञतय्सं धाःगु दु ।

नेपालय् आत्महत्या याइपिं मनूतय् ल्याः अप्वया वनाच्वंगुया कारण मानसिक तनाव, वैदेशिक रोजगार लगायत थीथी कारणं यानाः स्यना वनाच्वंगु पारिवारिक स्वापू, थीथी कथंया ग्यानापुगु ल्वय्, लागू पदार्थया सेवन आदि मू रुपं न्ह्यःने वयाच्वंगु खँ मनोविज्ञानीतय्सं धाःगु दु । मनूतय् हिला वनाच्वंगु सामाजिक अवस्थां नं थुकी तिबः बियाच्वंगु खनेदु ।