विहार निर्माणय् राज्यया उपस्थिति जूगु दु – मेयर शाक्य

यल- येँ महानगरपालिकाया प्रमुख विद्यासुन्दर शाक्यं भगवान बुद्ध नेपालय् जन्म जूुग खःसां थनया विहारत दक्वं मेमेगु देय्या ग्वाहालिं निर्माण जूगु धासें असन्तुष्टि प्वंकादिल ।

‘बुद्ध नेपालय् जन्म जूगु धकाः झीसं गर्व यायेगु यानाच्वना । तर, थनया विहारत सुनां दयेकल धकाः न्यन धाःसा गुगुं श्रीलंका, गुगुं थाइल्याण्ड, गुगुं म्यानमार, गुगुं जापानं दयेकस्गु धइगु लिसः वइ । नेपालं हे दयेकूगु विहारया नां धइगु तसकं म्हो जक न्यने दु ।’ महानगर प्रमुख शाक्यं धयादिल ।

आपालं विहारत मेमेगु देशं दयेका बिउगु धइगु न्यने दयाच्वंगुलिं हे थःपिं येँ महानगरय् निर्वाचित जुया वयेधुंकाः निर्वाचित जनप्रतिनिधि सकसिनं मंकाःकथं निर्णय यानाः नेपाल वज्रयान महाविहार निर्माणया निंतिं ग्वाहालि यानागु खः धयादिल । ‘थ्व स्वयां न्ह्यः दातातय् ग्वाहालिं जक विहार निर्माण जुया वयाच्वंगुलिइ थःपिं निर्वाचित जुया वयेधुंकाः राज्यया उपस्थिति क्यनेगु ज्या जूगु दु’ वय्कलं धयादिल ।

येँ महानगर प्रमुख शाक्यं उगु खँ थनया शंखम्वलय् च्वंगु अन्तर्राष्ट्रिय बौद्ध भावना केन्द्रय् निर्माण जूगु धम्म हलया उलेज्याझ्वलय् धयादीगु खः । येँ महानगरया करिब प्यंगू करोड आर्थिक अनुदानय् निर्माण जूगु धम्म हल भवन येँ महानगर प्रमुख शाक्यं वंगु शनिवाः उलेज्या यानादीगु खः ।

ज्याझ्वलय् नवासें वय्कलं त्वाःपतिकं दुगु विहार, आगंछेँ, त्वाःछेँ, क्वाःपाःछेँ महानगरया अनुदानय् निर्माण यायेगु ज्या जुयाच्वंगु जानकारी बियादिसें गुलिखे निर्माण सम्पन्न जुइधुंकूगु व गुलिखे निर्माण सम्पन्न व निर्माणाधीन चरणय् दुगु जानकार बियादिल ।

अथे हे वय्कलं परियत्ति शिक्षाया निंतिं आवश्यक पाठ्य सामगी छापे यायेत, दीक्षान्त ज्याझ्वः व नैतिक आचरणया क्रियाकलापया निंतिं महानगरपाखें ग्वाहालि याना वयाच्वनागु जानकारी बियादिसें भवनय् लिफ्ट जडानया निंतिं २५ गू लख ग्वाहालि यायेगु नं धयादिल ।
केन्द्रलिसें उपभोक्ता समितिया नायः प्रतीकरत्न ताम्राकारं महानगरपाखें प्राप्त अनुदानं धम्महल निर्माण सम्पन्न याये खंगुलिं लसता प्वंकादिल ।

२०७६ जेठ १२ गते भवन निर्माणया निंतिं सम्झौता जूगु खःसा असार १९ गते प्रमुख शाक्यं भवनया शिलान्यास यानादीगु खः। ७ गू करोड लागतय् निर्माण जूगु भवनय् धम्म हल, बैठक, भान्सा, प्रशासनिक लगायतया कक्षत निर्माण यानातःगु दुसा वंगु भदौ महिनाय्् जक हलय् थापना याःगु ध्यानी मुद्राया बुद्ध प्रतिमाया अनावरण याःगु खः ।

परियत्ति कक्षा संचालन, विपश्यना ध्यान लिसें थीथी ज्याझ्वः याना वयाच्वंगु केन्द्रया निंतिं धर्मनरसिंह शाक्यं जग्गा दान यानादीगु खःसा महानरया आर्थिक ग्वाहालिं भवन निर्माण याःगु खः ।