मेसीया हाकनं बार्सिलोनाय् वयेगु इच्छा

एजेन्सी- पेरिस सेन्ट जर्मेन (पीएसजी) या कासामि लियोनल मेसीं हाकनं छक्वः थःगु न्हापायागु क्लब बार्सिलोनाय् वयेगु इच्छा प्वंकूगु । मेसीं बार्सिलोनाय् छम्ह कासामिया रुपय् मखसे टेक्निकल सेक्रेटरीया रुपय् बार्सिलोनाय् वयेगु इच्छा दुु धाःगु खः ।

बार्सिलोना त्वःताः पीएसजी वंम्ह अर्जेन्टिनाया स्टार कासामि मेसीं छगू अन्तर्वार्ताय् बार्सिलोनायात थःम्हं न्ह्याबलें मतिना यानाच्वनागु व बार्सिलोनायात ग्वाहालि यायेगु धाःगु खः । ‘बार्सिलोना न्ह्याबलें बांलानाच्वेनमाः व बार्सिलोना न्ह्याबलें विश्वया उत्कृष्ट क्लब जुयाच्वेमाः’ मेसीं धाःगु दु ।

मेसी थुगुसी तिनि बार्सिलोना त्वःताः पीएसजी वंगु खः । मेसीं बार्सिलोना त्वःतावंसां निसें बार्सिलोनां बांलाःगु कासा क्यनेफुगु मदुनि । कमजोर प्रदर्शन यानाच्वंगुलिं क्लबया प्रशिक्षक रोनाल्ड कोम्यानयात बर्खास्त यायेधुंकूगु दु । मेसीं नं फ्रेन्च लिगय् पिएसजीया निंतिं गोल याःगु मदुनि । च्याम्पियन्स लिगय् धाःसा पीएसजीया निंतिं म्हितूगु स्वंगू कासा मध्ये निगू कासाय् गोल याःगु दु । मेसीं च्याम्पियन्स लिगय् म्यानचेस्टर सिटीयात २–० गोलं बुकेगु झ्वलय् छगू व आरबी लेइपजीगयात ३–२ गोलं बुकेगु झ्वलय् निगू गोल याःगु खः ।