अन्तिम मिनेटया गोलं उरुग्वेया विजयी सुरुवात

येँ- उरुग्वें नकतिनि क्वचाःगु कासाय् अन्तिम इलय् छगू गोल यासें विजय सुरुवात याःगु दु । इजिप्ट विरुद्ध जूगु कासाय् उरुग्वेया जोसे गिमेनेजं कासाया ९० औं मिनेटय् छगू जक गोल याःगु खः । इजिप्टया स्टार कासामि मोहम्मद सलाहयात बेञ्चय् तःगु कासाय् कार्लोस सान्चेजं थ्वाःगु फ्रिकिक हेड यासें गिमेनेजं विजयी गोल याःगु खः ।

कासाया झ्वलय् उरुग्वेया स्टार कासामि लुइस स्वारेजं प्यक्वः तक वःगु ह्वःताः तालाये लाकेमफुतसा इडिन्सन काभानीं २५ यार्ड तापाकं थ्वाःगु छगू बल नं पोस्टय् दुहां वनेमफुत ।

प्रिमियरशीप लिगय् लिभरपुलया निंतिं थुगु सिजनय् जक ४४ गू गोल याःम्ह सलाह ब्वहया चोटया कारणं बेञ्चय् च्वनेमाःगु खः । सलाहया अनुपस्थितिइ इजिप्टं धाःसा बांलाक आक्रमण यायेमफुत ।