नखःचखः न्ह्यःने पाकेटमार व खुँ अप्वल

येँ – नखःचखः न्ह्यःने वःलिसे पाकेट मारे याइपिं, खुँज्या याइपिं नं अप्वया वःगु दु । थ्व हे झ्वलय् सवारी साधन व बजारय् पाकेट मारे याःपिं व खुँज्याय् दुथ्याःपिं २०७ म्हेसित प्रहरीं येँया थीथी थासं ज्वंगु दु । स्वनिगलय् सञ्चालन जुइगु बस व माइक्रोबसय् यात्रा याइपिं यात्रु व मोहनि नखःया नितिं समान न्यायेत बजाः वनीपिनिगु पर्स, झोलाय् दुगु नगद, मोबाइल, तिसा खुयाच्वंगु अवस्थाय् उमित प्रहरी ज्वंगु खँ महानगरीय प्रहरी परिसरं धाःगु दु ।

ज्वंपिं २०७ मध्ये १६१ म्हेसित कयाः अनुसन्धान जुयाच्वंगु व ४६ म्ह अनुसन्धान पूवनाः जिल्ला प्रशासन कार्यालयं कारागार चलान यायेधुंकूगु खँ नं प्रहरीं जानकारी बिउगु दु । ज्वंपिसं सार्वजनिक बस दुने पुचः दयेकाः दुहां वनेगु व ध्यबा दुपिं यात्रु म्हसिकाः लिउने घेराबन्दी यानाः मोबाइल, नगद व लुँवहः पाकेट मारे यानाः छम्ह छम्ह यानाः कुहां वयाः बिसिउँ वनेगु यानाच्वंगु खँ प्रहरी धाःगु दु । पाकेट मारे यायेगु झ्वलय् उमिसं थीथी कथंया सांकेतिक भाय् छ्यलेगु याइगु खँ नं प्रहरीं धाःगु दु ।

सम्बन्धित बुखँ

LEAVE YOUR COMMENTS