संस्कृति संरक्षणया निंतिं यल मनपाया अन्तक्र्रिया

यल – यल महानगरपालिकां यलया संस्कृति संरक्षणया निंतिं जनप्रतिनिधि व सरोकारवालातय् लिसे छगू अन्तक्र्रिया ज्याझ्वः याःगु दु । ज्याझ्वलय् त्रिभुवन विश्वविद्यालयया संस्कृति विभागया पुलांम्ह प्रमुख प्रा. डा. विणा पौडेलं यल जिल्लाया संस्कृति संरुक्षणय् जनप्रतिनिधितय् भूमिकायात कयाः ज्यापौ न्ह्यब्वयादीगु खः ।

थ्व झ्वलय् वय्कलं यलय् दुगु थीथी पुरातात्विक रुपं महत्वपूर्ण देगः, द्यः, शिलालेख, मूर्त अमूर्त सम्पदाया बारे जानकारी बियादिसें थुकिया संरक्षणया निंतिं स्थानीय जनप्रतिनिधिपिंसं गज्याःगु भूमिका म्हितेफइ धयागु खँ कनादीगु दु । वय्कलं संस्कृति संरक्षणया निंतिं स्पष्ट व व्यावहारिक नियम दयेकाः न्ह्याः वनेमाःगु धासें संस्कृति संरुक्षण व प्रवद्र्धनया निंतिं महानगरपालिकां आवश्यक बजेट व स्रोत साधन परिचालन यायेमाःगु खँ धयादीगु खः ।

ज्याझ्वलय् संस्कृतियात रोजगारी, आर्थिक उन्नति व पर्यटन प्रवद्र्धन लिसे गुकथं स्वाना यंकेगु धयागु बारे नं सहलह जूगु खः । अथेहे आधुनिकताया दथुइ प्राचीन संस्कृति संरक्षणय् वयाच्वंगु हाथ्यायात गुकथं ज्यंकेगु धयागु बारे नं सहलह जूगु खः ।

यल महानगरपालिकाया सम्पदा, संस्कृति तथा पुरातत्व संरक्षण केन्द्रया प्रमुख मय्जु चन्द्रशोभा शाक्यं संस्कृति संरक्षणय् गज्याःगु नीति दयेकेफइ धयागु बारे जनप्रतिनिधितय्त जानकारी बीगु ताःतयाः थुगु ज्याझ्वः जूगु खँ कनादिल । वय्कलं ज्याझ्वलय् संस्कृति संरक्षणय् महानगरपालिकाया नीति, बजेट, कर्मचारीतय् दरबन्दी लिसें नगरपालिकां थौंकन्हय् यानाच्वंगु ज्याया बारे जानकारी बियादीगु खः ।