ने. सं. ११४६ बछलागा तृतीया -

स्थानीय चुनाव यायेत सुझाव

येँ – प्रधानमन्त्री शेरबहादुर देउवां म्हिगः निर्वाचन आयोग लिसे सहलह यानादीगु दु । निर्वाचनया मिति व पूर्वतयारी बारे सहलह यायेत म्हिगः निर्वाचन आयोगया प्रमुख आयुक्त दिनेश थपलिया सहित पदाधिकारीपिं बालुवाटार वंगु खः ।

प्रधानमन्त्री नापलायेगु झ्वलय् आयोगया पदाधिकारीपिंसं वइगु चैत ५ गते दुने निर्वाचन यायेमाःगु खँ धाःगु खः । आयोगं दकलय् न्हापा स्थानीय तहया निर्वाचन यायेमाःगु खँय् बः बिउगु खः । स्थानीय तहया निर्वाचनया नितिं संकटकाल बाहेक मेगु अवस्थाय् म्याद थप यायेगु व्यवस्था मदु धासें स्थानीय तह पदाधिकारीविहिन याये मजिउगुलिं देय्न्यंकं छगू हे चरणय् निर्वाचन यायेत नं आयोगया पदाधिकारीपिसं बः बिउगु खँ सीदुगु दु ।

आयोग पदाधिकारीतय्सं प्रदेशसभा व प्रतिनिधिसभाया ई मेगु १४ ला ल्यं दनिगुलिं न्हापां स्थानीय तहया निर्वाचन यायेमाःगु सुझाव बिउगु खः । छम्ह आयुक्तया कथं स्वंगुलिं तहया निर्वाचन छक्वलं यायेगु, अर्ली इलेक्सन थेंज्याःगु पिने चर्चा जुइच्वंगु खँ पाय्छि मजूगु व सविधानय् अज्याःगु व्यवस्था मदुगु जानकारी नं प्रमयात याकूगु खः ।

आयोगया पदाधिकारीपिंसं प्रदेश व प्रतिनिधिसभाया निर्वाचन छक्वलं यायेगु प्रस्ताव तःगु खःसा उकियात कयाः प्रधानमन्त्री देउवा सकारात्मक जूगु खँ धाःगु दु । निगू चरणय् चुनाव यायेबलय् छथाय्या माहौलं मेखे प्रभावित याये फइगु जूगुलिं छक्वलं निर्वाचन यायेत प्रम देउवा सहमत जुयादीगु खः ।

आयोगं स्थानीय तहया निर्वाचन छगू हे चरणय् यायेगु प्रस्ताव याःगु खँ धाःगु दु । थ्व स्वयां न्हापा जूगु स्थानीय तहया चुनाव स्वंगू चरणय् याःगु खः । आयोगं छगू हे चरणं स्थानीय तहया निर्वाचन यायेबलय् म्हो खर्च जुइगु लिसें सहज जुइ धासें उकिया नितिं माःगु तयारी यायेत स्रोत साधनया व्यवस्था यायेमाःगु खँ प्रधानमन्त्रीयात जानकारी याकूगु खः ।

आयोगया पदाधिकारीपिंलिसे सहलह यायेगु झ्वलय् प्रधानमन्त्री देउवां निर्वाचनयात स्वच्छ, पारदर्शी व शान्तिपूर्ण रुपं क्वचायेकेगु नितिं माःगु तयारी यायेत इनाप यानादीगु खः । उकथं हे म्हिगः आयोगया पदाधिकारीपिंत नापलायेगु झ्वलय् प्रम देउवालिसे राष्ट्रियसभा निर्वाचन, प्रतिनिधिसभा निर्वाचन व प्रदेशसभाया उपनिर्वाचन विषयय् नं सहलह यानादीगु खः ।

आयोगया कथं राष्ट्रियसभाया १९ म्ह दुजःपिनिगु पदावधि थ्वहे वइगु फागुन २० गते क्वचायेत्यंगु दु । कानुन कथं राष्ट्रियसभाया दुजःपिनिगु निर्वाचन पदावधि फुइ स्वयां ३५ न्हु यायेमाः । आयोगं वइगु माघ न्हापांगु वालय् राष्ट्रियसभाया निर्वाचन यायेत प्रस्ताव याःगु खँ नं सीदुगु दु । उकथं हे प्रतिनिधिसभा व प्रदेशसभाया उप निर्वाचन यायेगु बारे नं सहलह जूगु खः ।

उकथं हे आयोगया पदाधिकारीपिंसं निर्वाचन सम्बन्धी कानुन संशोधन व सुधार यानाः एकीकृत निर्वाचन कानुन दयकेत सरकारयात इनाप याःगु दु । उकथं हे निर्वाचनया नितिं मतदाता नामावली अद्यावधिक यायेगु बारे नं सहलह जूगु दु । आः वइगु छठ पर्व क्वचायेवं स्थानीय तहपाखें मतदाता नामावली अद्यावधिक यायेगु बारे नं सहलह जूगु दु ।