सत्यमोहन जोशीया जहान मंत, सीम्ह किष्ट अस्पतालयात दान याइगु

येँ – वाङ्मय शताब्दी पुरुष सत्यमोहन जोशीया जहान राधादेवी जोशी थौं सुथय् मंत । वंगु छुं ई न्ह्यवंनिसें सासः सम्बन्धी ल्वचं कयाः वय्कः किष्ट अस्पतालय् वासः याका च्वनादीगु खःसा थौं सुथय् ५ः५६ बजे वासः याकु याकुं वय्कः मदुगु खः ।

वय्कः १०० दँ दुम्ह खः । सत्यमोहन जोशीलिसे वय्कलं ८४ दँ ताःहाकःगु तिपू जीवन हनादीग दु ।

सत्यमोहन जोशी नं वंगु खुला न्ह्यः तिनि १०३ दँया वैंशय् मदुगु खः । जोशी मदुगुयां खुला व प्यन्हु लिपा जहान राधादेवी नं मदुगु खः । वंगु चैत २८ गते तिनि वय्कःया खुलाया श्राद्ध याःगु खः ।

थ्वहे झ्वलय् मदुम्ह राधादेवी जोशीया सीम्ह नं किष्ट अस्पतालयात दान याइगु जूगु दु ।

जोशीया तःधीम्ह कायभाजु अणराज जोशीं कनादीकथं राधादेवी जोशीं नं किष्ट अस्पतालयात शरीर दान यायेगु प्रतिवद्धता प्वंकातःगु कारणं वय्कःया सीम्ह किष्ट अस्पतालयात दान यायेत्यंगु खः । उकिं वय्कःया अन्तिम संस्कार सम्बन्धी छुं नं ज्या मजुइगु खँ धाःग दु ।

जोशीया कान्छाम्ह काय बेलायतं थौं येँय् थ्यनेवं शव हस्तान्तरणसम्बन्धी ज्याखँ न्ह्याकेगु तयारी जुयाच्वंगु दु ।

वाङ्मय शताब्दीपुरुष सत्यमोहन जोशीं नं थः मदयेधुंकाः थःगु सीम्ह चिकित्सकीय अध्ययनया निंतिं किष्ट अस्पतालयात दान यानादीगु खः ।