रेशमया जन्मकैद सदर, विधेयक हयाः नं त्वःते मफइगु

येँ (नेपालभाषा टाइम्स)-कैलालीया टिकापुर घटनाय् ल्हाः दुगु धासें जिल्ला अदालत कैलाली व उच्च अदालत दिपायलं जन्मकैदया सजाय न्यंकातःम्ह थारु अभियन्ता रेशम चौधरीया जन्मकैद सजाययात सर्वोच्च अदालतं नं सदर याःगु दु ।

सर्वोच्चया थुगु आदेश नापं चौधरीयात जन्मकैद जुइगु जूगु दु । सर्वोच्चका न्यायाधीशपिं आनन्दमोहन भट्टराई व नहकुल सुवेदीया मंकाः इजलासं म्हिगः चौधरीया हकय् जिल्ला व उच्च अदालतं क्वःछिउगु जन्मकैद सजाययात सदर याःगु खः ।

उगु हे मुद्दाय् द्वपं फयाच्वंपिं सिताराम चौधरी व गंगाराम चौधरीयात धाःसा सफाइ बिउगु दु । सिताराम व गंगारामपिं जिल्ला व उच्च अदालतया आदेश कथं जन्मकैद भुक्तानया नितिं जेलय् लानाच्वंपिं खः । उमित म्हिगः हे त्वःतेत नं सर्वोच्चं आदेश बिउगु दु । उकथं हे जिल्ला अदालतं ठहर याःकथं स्वदँया कैद सजाय फयेधुंकूम्ह लक्ष्मण थारुयात उच्च अदालतं क्वःछिउगु जन्मकैदयात जिल्लाया फैसलायात हे सदर याःगु दु । फैसला कथं थारु नं आः थप जेलय् च्वनेम्वाःलीगु जूगु दु ।

रेशमयात त्वःतेगु नितिं सरकारं विधेयक हयेगु कुतः यानाच्वंगु इलय् सर्वोच्च अदालतया थुगु फैसला वःगु खः।  थ्व फैसला लिपा सरकारं हयेत्यंगु विधेयकपाखें रेशमयात त्वःते मफइगु जूगु दु । सरकारं अदालतय् विचारधीन मुद्दा लानाच्वंपिं राजनीतिक बन्दीयात त्वःतेफइगु कथं विधेयक हयेत्यंगु खः । तर रेशमया मुद्दाय् फैसला हे वयेधुंकूगु जूगुलिं थ्व मुद्दा अाः विचाराधीन मजुल । जन्मकैदया मुद्दाय रेशमं सर्वाेच्च तःगु थ्व मुद्दा ताःइ तक हे विचाराधीन अवस्थाय् लानाच्वंगु खः ।