फिफा वरियताय् नेपाः छगू स्थान कुहां वल
एजेन्सी÷ विश्व फुटबलया सर्वोच्च निकाय फिफां सार्वजनिक याःगु न्हूगु वरियताय् नेपाः छगू स्थान कुहां वःगु दु । फिफां बिहिवाः सार्वजनिक याःगु न्हूगु वरियताय् नेपाः १६९ गूगु थासय् दु । सेप्टेम्बरय् सार्वजनिक जूगु वरियताय् नेपाः १६८ गूगु थासय् दुगु खः । दक्षिण एसियाय् नेपाः स्वंगूगु थासय् दु । विश्व वरियताय् १०६ गूगु थासय् दुगु भारत दक्षिण एसियाय् न्हापांगु थासय् दु । अथे हे माल्दिभ्स दक्षिण एसियाय् निगूगु थासय् दु । दक्षिण एसियाय् नेपाः धुंकाः बंगलदेश, भुटान, पाकिस्तान व श्रीलंका दु ।
अक्टोबरय् जूगु साफ च्याम्पियनसिपय् न्हापांखुसी फाइनलय् थ्यंसां नेपाः फिफाया वरियतां धाःसा कुहां वःगु खः । दक्षिण एसियाली राष्ट्र बंगलादेश (१८६औंं), भुटान (१८७ औं), पाकिस्तान (१९७ औं) व श्रीलंकां (२०४ औं) धाःसा वरियताय् सुधार याःगु दु । फिफां सार्वजनिक याःगु न्हूगु वरियताय् बेल्जियम शीर्ष थासय् दु । अथे हे ब्राजिल निगूगु थासय्, फ्रान्स स्वंगूगु थासय्, इटाली प्यंगूगु थासय् व इंग्ल्याण्ड न्यागूगु थासय् दु । अथे हे अर्जेन्टिना खुगूगु, स्पेन न्हय्गूगु, पोर्चुगल च्यागूगु, मेक्सिको गुंगूगु व डेनमार्क झिगूगु थासय् दु ।
LEAVE YOUR COMMENTS