बार्सिलोनाया मुख्य प्रशिक्षक बर्खास्त

एजेन्सी- स्पेनिस क्लब बार्सिलोनाया मुख्य प्रशिक्षक रोनाल्ड कोम्यान बर्खास्त जूगु दु । ला लिगा अन्तर्गत बुधवाः बहनी जूगु कासाय् रायो भालाकानोलिसे बार्सिलोना बुइवं क्लबं मुख्य प्रशिक्षक कोम्यानयात बर्खास्त यायेगु निर्णय याःगु खः । रायो भालेकानो बार्सिलोनायात १–० गोलं बुकूगु खः । प्रशिक्षक नियुक्त जूगु झिंप्यला लिपा बर्सिलोनां कोम्यानयात बर्खास्त याःगु खः । बार्सिलोनां अगस्ट २०२० य् रोनाल्ड कोम्यानयात मुख्य प्रशिक्षक दयेकूगु खः ।

थ्व सिजनय् बार्सिलोनां खराब प्रदर्शन यानाच्वंगु दु । ला लिगाय् बार्सिलोना म्हितूगु झिगू कासा मध्ये प्यंगू जक त्याःगु दु । स्वंगू कासा बराबरी म्हितूगु खःसा स्वंगुलिइ पराजित जूगु दु । लिगय् बार्सिलोना गुंगूगु थासय् दु । च्याम्पियन्स लिगय् नं बार्सिलोनां बांलाःगु प्रदर्शन यायेफूगु मदु । च्याम्पियन्स लिगया आःतक म्हितूगु स्वंगू कासा मध्ये निगुलिइ बार्सिलोना बूगु दुसा छगू जक त्याःगु दु ।

कोम्यानया थासय् बार्सिलोनां सुयात प्रशिक्षक दयेकी धयागु चर्चा जुयाच्वंगु दु । थुकी दकलय् न्ह्यःने बार्सिलोनाया पुलांम्ह कासामि व कप्तान जाभीया नां दु । जाभी थौंकन्हय् कतारया क्लब अल शादया प्रशिक्षक जुयाच्वंगु दु ।