‘नेवाः विरोधी विकास मयाये’

येँ – थनिंनिसें येँय् शुरु जूगु लगानी सम्मेलनय् स्वनिगःया आदिवासी नेवाःतय्गु वस्ती, संस्कृति व सभ्यता नष्ट जुइ कथंया ‘विकास’ निर्माणया ज्याय् सुनां नं लगानी मयायेमा धकाः स्थानीय जनतां सरोकार क्यंगु दु । उपत्यकाव्यापी सडक विस्तार पीडित संघर्ष समितिं म्हिगः थन छगू पत्रकार सम्मेलन यासें लगानी सम्मेलन जुयाच्वंगु हे इलय् संयुक्त राष्ट्र संघ लगायत थीथी दाता देय्या दुतावासय् ज्ञापनपौ बियागु जानकारी याःगु खः ।

पत्रकार सम्मेलनय् संघर्ष समितिया नायः सुमन साय्मिं बियादीगु जानकारी कथं समितिं थुकिया बारे संयुक्त राष्ट्र संघया ज्याकू नापं विश्व बैंक, एशियाली विकास बैंक, युरोपियन कमिसन, भारतीय दुतावास, चिनियाँ दुतावास, अमेरिकी दुतावास, बेलायती दुतावास, नेर्वे दुतावास, स्वीस दुतावास, फिनल्याण्ड दुतावास, जापानी दुतावास, अष्ट्रेलियन दुतावास, कोरियाली दुतावास, जर्मन दुतावास, डेनिस कन्सुलेट लगायतयात ध्यानाकर्षण पौ लःल्हाये धुंकूगु दु ।

येँय् जुइगु लगानी सम्मेलनं बिउगु जानकारी कथं सम्मेलनय् अज्याःगु परियोजना बारे नं प्रस्ताव यानातःगु दु गुकिं स्वनिगःया आदिवासी जनताया वस्ती व संस्कृतियात प्रभावित याइ । आः तत्काल सरकारं सार्वजनिक याः कथं येँया सामाखुसि–टोखा–छहरे तकया सडक विस्तार, बाहिरी चक्रपथ लगायतया योजना न्ह्यःने वयाच्वंगु दु । थ्व आयोजना –तय्सं लाकीगु लिच्वःयात कयाः स्थानीय पीडित जनतां सर्वोच्च अदालतय् मुद्दा नं तयातःगु दुसा थ्व मुद्दा आः विचाराधीन जुयाच्वंगु जानकारी नं संघर्ष समितिं बिउगु दु ।

सतक विस्तारपाखें लाइगु लिच्वः बारे राष्ट्र संघीय श्रम संगठनया धारा १६९ या ज्याकुथी उजरी तयाबलय् उगु ज्याकुथिं निगुलिं पक्ष च्वनाः खुलाया दुने थ्व समस्या समाधान या धकाः उजं बियाहःगु खःसां सरकारं धाःसा आः तक वार्ताय् तकं मसःतुसे राष्ट्र संघया उजंयात तकं उल्लंघन यानाच्वंगु द्वपं नं नायः साय्मिं बियादिल ।

संघर्ष समितिं थःपिं विकास विरोधी मखु धासें तर थःपिंत अज्याःगु विकास माः गुकी फुक्कं समुदाय, तह व तप्काया जनताया सहभागिता, मानव अधिकार मैत्री व न्यायोचित जुइमा धाःगु दु । आदिवासीतय्गु विकासया थःगु हे अवधारणा व मोडेल दइ धासें थुकी उमिगु जीवनशैली हे प्रभावित जुइ कथं छुं नं ज्या मयाकेगु लागिं नेपाः सरकारयात सचेत यायेगु लागिं विदेशी दाता निकायतय्त इनाप यानागु खँ नं समितिं धाःगु दु ।