कन्हय् सडक विस्तार पीडिततय् प्रदर्शन छाय् ? फैसला उल्टे जुइगु सम्भावना !

येँ – सर्वोच्च अदालतया फुलबेञ्चं मुआब्जा बियाः जक सतक विस्तार यायेमाः धकाः फैसला यायेधुंकाः नं सरकार धाःसा उकियात हाचांगायाः जूसां न्ह्याः वनेत्यंगुलिं सडक विस्तार पीडिततय्सं हानं संघर्ष यायेत्यंगु दु । सर्वोच्च अदालतया उगु फैसला उल्टे याकेगु लागिं सरकारं पुनरावलोकनय् वनेगु ज्या याःगुलिं सडक संघर्ष पीडितत आन्दोलनय् वनेमाःगु खः ।

गैर न्यायिक सडक विस्तार विरुद्धया संघर्षं भचा दिपाः कयाच्वंगु खःसा आः राज्य हे उगु फैसलाया अःखः पुनवरालोकनय् वनेवं न्हूगु कथंया आन्दोलनया तयारी याना कुहां वःगु खः ।

राज्य पुनरावलोकनय् वंगु अले थ्वहे पुस ५ गते पेशी बीगु दिं जुयाः उकुन्हु हे शक्ति प्रदर्शन यात धाःसा सर्वोच्च अदालतया फैसला कार्यान्वयन याकेत नापं ऐतिहासिक, पुरातात्विक, धार्मिक सम्पदा नापं वस्तीयात तकं संरक्षणया नितिं बांलाःगु तिबः जुइगु तायेकाः सरोकारवालातय्सं मंकाः शक्ति प्रदर्शन यायेत्यंगु खः ।

आःया अवस्थाय् सतक विस्तार विरुद्ध संघर्ष यानाच्वंपिं जक मखु सम्पदाप्रेमि, नेवाः सभ्यता ल्यंकेमाः धाइपिंनिसें फास्ट ट्राय्कया विरुद्ध सतकय् कुहां वयाच्वंपिं तकं मंकाः कथं आन्दोलनय् कुहां वःगु दु ।

थ्वहे झ्वलय् कन्हय् पुस ५ गते विहिवाः उपत्यकाब्यापी सतक विस्तार पीडित संघर्ष समितिया संयोजनय् फास्ट ट्राय्क विरुद्ध संघर्ष यानाच्वंपिं, बाहिरी चक्रपथ विरुद्ध संघर्ष यानाच्वंपिं, स्वनिगःया सभ्यतायात ल्यंकेमाः धकाः संघर्ष यानाच्वंपिंनिसें चाबहीया दिपयात संरक्षण यायेमाः धकाः आन्दोलन यानाच्वंपिं तकं सहभागी जुयाः मंकाः शक्ति प्रदर्शन यायेत्यंगु दु ।

नेवाः वसः पुनाः नेवाः बाजं थानाः उकिया नापनापं ख्वनाया सिकालि द्यःया प्याखंम्वः जुइपिं द्यःपिं तकं थुगुसीया प्रदर्शनय् सहभागी जुयादीगु खँ धाःगु दु । सुथय् १० बजेनिसें सुरु जुयाः १ बजे तक माइतिघर मण्डलाय् जुइगु उगु प्रदर्शनय् स्वनिगःया फुक्क लागायापिं हे सहभागी जुयादीगु खँ धाःगु दु ।

उकुन्हु हे ख्वनाया सलंसःम्ह नेवाःत माइतिघर मण्डला लिक्क च्वंगु पुरातत्व विभागय् वनाः अनया कुदेश व सिकाली लागाया उत्खनन् यायेत, संरक्षण यायेत तकं निवेदन बीगु ज्या जुइ धाःगु दु । लिपांगु इलय् प्रधानन्यायाधीशय् चोलेन्द्र शबशेर जबरा वइगु निश्चित जुइधुंकूगु सतक विस्तार पीडितत चिन्तित जूगु दु ।

न्यायाधीश चोलेन्द्र शमशेर न्हापांनिसें सडक विस्तारया पक्षय् भूमिका म्हिता वयाच्वंम्ह जूगुलिं सरकारं पुलांगु फैसला उल्टे यायेत तःगु निवेदनया पक्षय् वय्कः वने फुगु खँ धाःगु दु । सरकारं वय्कः प्रधानन्यायाधीश जुयाः वइगु इलय् लाक्क हे थ्व निवेदन नं छ्वःगु खः ।