लुम्बिनी गुरुयोजनाया अन्तिम ज्या न्ह्यात

येँ- विश्वन्यंकं च्वंपिं बौद्धमार्गीतय्गु आस्थाया केन्द्र जुयाच्वंगु लुम्बिनीइ गुरुयोजना कथंया अन्तिम ज्या शुरु जूगु दु । जापानया प्रा. केन्जो तांगें थ्व गुरुयोजना तयार यानादीगु खःसा उकियात अन्तिम रुप बीगु ज्या धाःसा आः ४३ दँ लिपा वयाः तिनि जुइत्यंगु दु ।

गुरुयोजना कथं लुम्बिनीइ आः याये ल्यं दनिगु अन्तिम ज्या कथं अस्पताल, १४ किलोमिटर सतक, ५५ किलोमिटर ड्रेनेज, २३ किलोमिटर ब्लक रोड, सतकया निखेरं ८÷८ मिटरया ग्रिनरी, १३ थासय् आकर्षक ध्वाखा, पर्सा र लखरियाय् आकर्षक झ्वाता समेत दुगु ध्वाखा, प्यंगू पञ्चधातु पार्क, छगू सारस पार्क, १७०० प्वाः सतक मत, च्यागू पार्किंग स्थल व आन्तरिक लिङ्केज सडक दयेकेगु ज्या जुइत्यंगु खः । उकिया लागिं ठेक्का बीगु ज्या जुइधुंकूगु दु ।

लुम्बिनी विकास कोषया सदस्य सचिव सानुराजा शाक्यं कनादी कथं थ्व फुक्क हे ज्या अन्तर्राष्ट्रियस्तरया जुइ । लुम्बिनीइ ११५ गू देय्या नागरिकत भ्रमण यायेत वइगु जूगुलिं गुणस्तरय् छुं हे सम्झौता मयायेगु खँ वय्कलं कनादिल । बिहीवाः छगू समारोहया दथुइ थुकिया सम्झौता यायेगु ज्या जूगु खः । सदस्य सचिव शाक्यं कनादी कथं थ्व फुक्क ज्या आः वइगु निदँया दुने सम्पन्न जुइ । लुम्बिनीया अन्तिम ज्या सम्पन्न यायेगु लागिं आः करिब ७ अर्ब तकाया ज्या याये ल्यं दनि । उकी मध्ये ३ अर्ब ५० करोड तकाया ज्या यायेगु लागिं सम्झौता जूगु खः ।

विकास कोषया उपाध्यक्ष भिक्षु मेत्तेयां नं आः जुइत्यंगु ज्या सामान्य कथंया मखु धयाबिज्याःगु दु । लुम्बिनीया थ्व गुरु योजना लागू यायेगु लागिं अन वस्ती जुयाच्वंगु ७ गू गां चीकूगु जुयाः थन छुं हे कथंया गुनासो वइ कथं ज्या याये मजिउगु बिचाः नं वसपोलं प्वंकाबिज्याःगु दु ।

थुलि ज्या जुइधुंकल कि अन संसारया हे छगू उत्कृष्ट बौद्ध शहर निर्माण याये फइगु अनुमान जुयाच्वंगु दु । सन् १९७८ स जापानया वास्तुकलाविद् केन्जो तांगें लुम्बिनीया गुरुयोजना तयार यानादीगु खःसा ४० दँया दुने उकिया ८० प्रतिशत ज्या जक क्वचाःगु दु । थन आः तक दकलय् अप्वः थीथी देय्या विहार दयेकेगु ज्याय् खर्च जूगु दु ।

मायादेवीया देगः, अशोकस्तम्भ, पुष्करणी पुखू लागा लुम्बिनीया दकलय् संवेदनशील व महत्वपूर्ण धार्मिक एवं पुरातात्विक क्षेत्र खः । थ्व क्षेत्र बचे यायेगु लागिं गुरुयोजनाय् विशेष बिचाः यानातःगु दु । खुसिबाःपाखें अन छुं लिच्वः मलाकेगु लागिं थीथी पुखू, ड्रेनेजत दयेकातःगु दु । लुम्बिनी प्राचीनकालंनिसें हे बौद्धमार्गीतय् लागिं पवित्र तीर्थस्थल जुया वयाच्वंगु थाय् खः ।