पेस्तोल सहित प्यम्ह ज्वन

ख्वप‍- सशस्त्र प्रहरीं ख्वप नपा वडा १ स्थित सल्लाघारी लागां शनिवाः इटालियन पेस्तोल सहित प्यम्ह ल्याय्म्हतय्त ज्वंगु दु । व्यासीया भक्तपुर औद्योगिक क्षेत्रय् च्वंगु २८ गुल्मपाखें खटे जूगु सशस्त्र प्रहरी पुचलं उमित ज्वंगु खः । ज्वंपिं ल्याय्म्हत मुगुया २२ दँ दुम्ह भीमप्रसाद यादव, बालकोटया २१ दँ दुम्ह बलजित शाही, १८ दँ दुम्ह गणेश शाही व मोतिलाल खः ।

मोतिलालपाखें मेड इन इटली च्वयातःगु पेस्तोल छपु, उकी तइगु गोली न्यागः व छगू म्याग्जिन बरामद याःगु खः । उपिंपाखें झिंनिद्वः तका दां, निगः मोबाइल नं बरामद याःगु दु । च्वंगा गणेश रेष्टुरेण्टय् हतियार सहित मनूत च्वनाच्वंगु विशेष सुचं वयेवं अन सशस्त्र प्रहरीं छापे मारे यानाः प्यम्हेसित ज्वंगु खः । उमित आः कानुनी कारवाहीया लागिं प्रहरी परिसर ख्वपय् तयातःगु दु । थ्वहे झ्वलय् प्रहरीं लुटपाट यानाच्वंगु थासं पेस्तोल सहित स्वम्हेसित ज्वंगु दु । शनिवाः बहनी ७ बजे येँया जडिबुटी च्वंगु गणेशमाया श्रेष्ठया छेँय् लुटपाट यानाच्वंपिंत ज्वंगु खँ प्रहरीं धाःगु दु ।

स्वम्हेसिया थ्व पुचःपाखें प्रहरीं चाइनिज पेस्तोल, छगू राउण्ड गोली व छपु खुकुरी बरामद यानागु महानगरीय प्रहरी येँनं जानकारी बिउगु दु ।
ज्वंपिं कलंकीइ च्वनीम्ह गल्छीया ३३ दँया अर्जुनप्रसाद अधिकारी, २५ दँया केदारप्रसाद अधिकारी व काभ्रेया भुम्जु छेँ जुयाः चाबहिली च्वनीम्ह ३० दँया अञ्जन उप्रेती खः । प्रहरीं बिउगु जानकारी कथं उप्रेती गुण्डा नाइके कुमार घैंटेया सहयोगी जुयाः आपराधिक क्रियाकलापय् सक्रिय जुयाच्वंम्ह खः । अथेहे केदार निदँ न्ह्यः नेपाल प्रहरी व स्वदँ न्ह्यः नेपाली सेनाय् जागिर नयाः बिसिउँ वनाच्वंम्ह खः ।

सम्बन्धित बुखँ

LEAVE YOUR COMMENTS