ने. सं. ११४६ बछलाथ्व दुतिया -

दछि न्ह्यः रेल वंगु वनं

येँ -निवर्तमान प्रधानमन्त्री केपी ओलीं जनकपुर–जयनगर रेल सेवा चले यायेत थःपिंसं हे न्याना काःगु निगू सेट धनुषाया जनकनन्दिनी गाउँपालिकाय् त्रिपालं त्वपुयाः वांछ्वयातःगु नं दछि दयेधुंकल, तर रेल चले जुइगु छाँट धाःसा अझं पिहां वःगु मदुनि । नेपालं न्याना काःगु रेल तयार जुल धकाः थगुने धकाः थ्व रेल जनकपुर थ्यंक चले यानाः क्यंगु नं खः ।

तर छन्हु चले यानाः लित यंकूगु उगु रेल आः तक हानं गुडे जूगु मदुनि । रेल त्वपुइत तयातःगु त्रिपाल तकं लः व निभालं यानाः प्वाः प्वाः गनेधुंकल । थ्व रेल चले यायेत नेपालं आः तक कानून मदयेकूगु जक मखु रेल दयेकूगु कम्पनीयात बीमाःगु ध्यबा तकं आः तक मबिउगु कारणं यानाः नं चले याये मफयाच्वंगु खँ धाःगु दु ।