येँया न्हूम्ह मेयरया न्हापांगु नीति तथा कार्यक्रम : नेपालभाषां ब्वनेज्या निरन्तर, अयलाःया ब्राण्डीङ, त्वाःया पुलांगु नां पुनर्स्थापना यायेगु

येँ येँ लभाषा टाइम्स)महा– पालिकाया मेयर बालेन्द्र साहं म्हिगः थःपिनि न्हापांगु नीति तथा कार्यक्रम सार्वजनिक यानादिल । वय्कःया नीति तथा कार्यक्रमय् खास हे हिउपाः खने दइगु छुं न्हूगु विषय दुमथ्याःसां येँ देय्या स्थानीय जनताया नुगः सालीगु बुँदात धाःसा आपालं दुथ्याकूगु महसुस याना हःगु दु ।

येँ महानगरपालिका दुनेया फुक्कं सामुदायिक व संस्थागत विद्यालयय् नेपालभाषाया माध्यमं स्थानीय विषय ब्वंकेगु ज्यायात निरन्तरता बीगु ज्या नीति तथा कार्यक्रमयय् दुथ्याः । वय्कलं थःगु नीतिया ३ नम्बर बुँदाय् थ्व खँ दुथ्याकातःगु दु । थुकियात येँ देय्या जनतां सकारात्मक रुपं काःगु दु ।

अथे हे येँया मौलिक पहिचान जुयाच्वंगु रञ्जना लगाययात लिपि संरक्षण यायेगु लागिं विशेष कार्यक्रम हयेगु लिसें येँ देय्या थीथी त्वाःया पुलांगु नां पुनस्र्थापना यायेगु कार्यक्रम न्ह्याकेगु खँ नं नीतिइ दुथ्याकूगु दु ।

येँ देय्या मौलिक वास्तुकलायात च्वन्ह्याकेगु लागिं थाय्थासय् तयातःगु बसस्टपयात आः फल्चा शैलीं दयेकेगु व स्वनिगःया स्थानीय नेवाःतय्सं छेँय् दयेकीगु अय्लाःयात ब्राण्डिङ यानाः अन्तर्राष्ट्रिय बजारय् छ्वयेगु खँ नं न्ह्यथनातःगु दु । अथे हे पुलांगु ल्वहं हिति व परम्परागत दबूतय्त हानं म्वाकेगु लागिं कुतः यायेगु खँ नं उकी दुथ्याः ।

विवादय् लानाच्वंगु हरिभवनस्थित महानगरपालिकाया पुलांगु भवनयात आः थुना छ्वयेगु पलेसा रेक्ट्रो फिटिङ यानाः सुरक्षा बीगु खँ नं थुकी दुथ्याः सर्वोच्च अदालतं नं उगु भवन रेक्ट्रो फिटिङ यानाः सुरक्षित या धकाः हे आदेश बियातःगु दु । लिसें येँ मनपा २२ वडास्थित पुलांगु नगरपालिकाया भवन दुगु थासय् आः नेवाः सम्बन्धी अध्ययन अनुसन्धान यायेगु येँ देय् सांस्कृतिक छेँ दयेकेगु घोषणा नं उकी यानातःगु दु ।

येँय् लः रिचार्ज यायेगु लागिं खाली जुयाच्वंगु सरकारी जग्गाय् पुखू व पुनर्भरण यायेगु थाय् दयेकेगु, येँ देय्या करदातातय्त मनपां हे ५० प्रतिशत दां तयाः स्वास्थ्य बिमा यानाबीगु खँ नं दुथ्यानाच्वंगु दु ।
न्हूम्ह मेयर साहं येँ देय्या पुलांगु नारायात छुं भचा संशोधन यानाः ‘सांस्कृतिक सहर, समृद्ध महानगर’ धकाः तःगु दु ।

‘नेपालभाषा फुक्कं विद्यालययात खः’
येँ महानगरपालिकापाखें नेपालभाषाया माध्यमं ब्वंकेगु याना वयाच्वंगु स्थानीय विषय फुक्क सामुदायिक विद्यालयय् जक लागू जुयाच्वंगु धकाः नीति तथा कार्यक्रमया छगू बुँदाय् उल्लेख जुयाच्वंगु दु । मनपा शिक्षा विभागया प्रमुख रामप्रसाद सुवेदीं अथे उल्लेख जुयाच्वंसां व गल्ती जूगु खँ धयादीगु दु । मनपां सामुदायिक (सरकारी) व संस्थागत (निजी) यानाः फुक्क हे स्कलय् नेपालभाषाया माध्यमं स्थानीय विषय ब्वंकेगु हे नीति आःया नेतृत्वं नं काःगु जूगुलिं उकी सुं नं भ्रमित मजुइत नं सकसितं इनाप यानादीगु दु ।