ने. सं. ११४३ चौलाथ्व तृतीया -

एकेदमिया ग्वसालय् स्वन्हुयंकं सफू ब्वज्या

येँ – नेपालभाषा एकेदमिया ग्वसालय् नेपालभाषाया सफू ब्वज्या जुइगु जूगु दु । थ्व वहे वइगु गुंलाथ्व नवमिनिसें एकादशितक स्वन्हुयंकं जुइगु उगु सफू ब्वज्या यलया उग्रचण्डी (तमकः)द्यःया परिसरय् जुइ । थुगुसी जुइगु सफू ब्वज्याया हे झ्वलय् स्वन्हुयंकं विशेष आकर्षणकथं थीथी ज्याझ्वः जुइगु एकेदमिं जानकारी बिउगु दु ।

ब्वज्याया न्हापांगु दिं उलेज्यालिसें ‘नेवाः प्रज्ञा’ जर्नलया स्वंगूगु ल्याःया नं पितब्वज्या जुइ । थुगुसीया ल्याः नेपालं पिने च्वंपिं नेवाःलिसें विदेशी विद्वानपिंसं नेवाःतय् बारे च्वयातःगु च्वसु दुथ्याकाः उगु जर्नल पिथनेत्यंगु खः ।

अथे हे ब्वज्याया निन्हुया न्हिकुन्हु नेपाल लिपि गुथिया ग्वसालय् नेपाल लिपिया ब्वज्या यायेगु ज्याझ्वः तयातःगु दुसा लिपांगु न्हिकुन्हु संकिपाकःमि, कलाकार, प्राविधिक व उद्योगी, व्यापारीसहितया उपस्थितिइ नेपालभाषाया संकिपा बारे विचार गोष्ठि नं याइगु जूगु दु । लिसें नेपालभाषा साहित्यया विषयय् नं अन्तक्र्रिया ज्याझ्वः जुइगु एकेदेमिया दुजः लिसें ब्वज्या उपकमिटीया कजि विजयरत्न असंबरें जानकारी बियादीगु दु ।

ब्वज्याय् स्टल तयेगु मं दुपिंसं थ्व हे वइगु दिल्लागा आमाइतकया दुने स्वापू तयाः थःगु थाय् सुरक्षित यानादीत नं ग्वसाः खलकं इनाप याःगु दु । वंगु प्यदँ न्ह्यवंनिसें एकेदमिं थुकथंया ब्वज्या याना वयाच्वंगु खःसा थुगुसी जुइगु ब्वज्याय् स्टलया निंतिं गुगुं शुल्क लगे मजुइगु एकेदमिं जानकारी बिउगु दु ।

ब्वज्या ताःलाकेया निंतिं असंबरेया संयोजकत्वय् छगू उपकमिटी नं नीस्वंगु दुसा उकी शान्तराज शाक्य, पवित्र कसाः, राजीव राजोपाध्याय, सुरजवीर वज्राचार्य, नृपेन्द्रलाल श्रेष्ठ, मिना वज्राचार्य व राजुराजदेव वज्राचार्य दुजःकथं ल्ययागु एकेदमिया सदस्य सचिव मल्ल के. सुन्दरं कनादिल ।