ने. सं. ११४४ कौलाथ्व तृतीया -

तालिबान अफगानिस्तानया राजधानी काबुलय् दुहां वन

एजेन्सी- अफगानिस्तानया राजधानी काबुलय् तालिबानत दुहां वंगु दु । थीथी अन्तर्राष्ट्रिय समाचार माध्यमं बिउगु जानकारीकथं आइतवाः तालिबान लडाकुत काबुलय् प्यखेरं दुहां वंगु खः । अफगानिस्तानया आन्तरिक मामिलामन्त्रीं समाचार संस्था रोयर्टसयात बिउगु जानकारीकथं काबुलय् दुहां वयेगु दक्व दिशां तालिबान लडाकुत दुहां वयेधुंकूगु दु । आइतवाः सुथय् विना संघर्ष पूर्वय् च्वंगु सहर जलालाबादयात नियन्त्रणय् कायेधुकाः तालिबानत राजधानी काबुलय् दुहां वंगु खः ।

बिबिसीं बिउगु जानकारीकथं काबुलय् तालिबानत विना प्रतिरोध दुहां वंगु खः । बिबिसीं तालिबानया नेतात व अफगान सरकारया दथुइ खँल्हाबल्हा जुयाच्वंगु नं धाःगु दु । तालिबानया नेतातय्सं थः लडाकुतय्त काबुलय् हिसां मयायेत व पिहां वनीपिंत सुरक्षित रुपं पित छ्वयेत निर्देंशन बिउगु दु । तालिबानं शक्ति मछ्यसे हे काबुलयात नियन्त्रणय् कायेत स्वयाच्वंगु दु ।

तालिबानं अफगान सरकारयात शान्तिपूर्णं रुपं सत्ता लःल्हायेत धाःगु दु । तालिबानया प्रवक्ता सुहेल शाहीनं सरकार व तालिबानया दथुइ जुयाच्वंगु धाःगु वार्ताया बारे जानकारी बिइत धाःसा अस्वीकार याःगु दु ।

अफगानिस्तानया राष्ट्रपति असरफ घानी ट्विट यानाः राजधानी थःपिनिगु नियन्त्रणय् दुगु धाःगु दु । राष्ट्रपति असरफं ट्विटय् धाःगु दु ‘काबुलय् छुं भचा गोलीया सः तायेदुसां काबुलय् हमला जूगु मदु । सहरयात सुरक्षित यायेत सुरक्षाबल व सेनां अन्तर्राष्ट्रिय ग्वहालिमितलिसे जानाः ज्या यानाच्वंगु दु । आःयात स्थिति नियन्त्रणय् दु ।’

राष्ट्रपतिं राजधानी थःपिनिगु नियन्त्रण दु धाःसां राजधानीइ च्वनाच्वपिं मनूत मेमेगु देसय् बिसिउँ वनाच्वंगु दु । अमेरिकां नं काबुलय् च्वंगु थःगु दूतावास खाली यायेधुंकूगु दु । भारत लिसें मेमेगु देसं नं थःपिनि दूतावास व थीथी ज्याकुथिइ ज्या यानाच्वंपिं कर्मचारीतय्त लित हयेत स्वयाच्वंगु दु । पाकिस्तानं नं अफगानिस्तानलिसे स्वानाच्वंगु टोरखाम सीमा बन्द याःगु दु ।