निपाह भाइरस नेपाःयात नं खतरा

येँ – भारतय् न्यना वनाच्वंगु निपाह भाइरसयात कयाः सचेत जुइत स्वास्थ्य मन्त्रालयं इनाप याःगु दु । मन्त्रालयं सोमवाः छगू वक्तव्य जारी यासें भारतया केरलाय् थ्व भाइरस संक्रमण जुया वनाच्वंगुलिं नेपालय् नं न्यना वनेफुगुलिं सचेत जुइत धाःगु खः ।

भारतया केरलाय् छुं न्हि न्ह्यवंनिसें थ्व भाइरस खनेदुगु खः । थ्व भाइरस फुट ब्याट प्रजातिया चिकंलापायाके दइ । थ्व भाइरस चिकंलापापाखें जनावरयात व जनावरपाखें मनूयात सरे जुइगु प्रकृतिया भाइरस खः । थ्व भाइरस पुन धायेवं ज्वर वइगु, इकुसे च्वनीगु, छ्यं स्याइगु, मांसपेशी स्याइगु, वाकवाक वइगु, सासः ल्हाये थाकुइगु व टन्सिल जुइगु खँ धाःगु दु । थ्व भाइरस संक्रमित पशुपंक्षीं थिउगु सिसाबुसा, तरकारी नल धाःसा सरे जुइफु धाःगु दु । उकिं तरकारी सिसाबुसा नयेबलय् नं बांलाक सिलाः जक नयेत मन्त्रालयं सचेत याःगु दु ।

मन्त्रालयया प्रवक्ता डा. कृष्णप्रसाद पौडेलं थ्व भाइरस संक्रमण जुल धाःसा ४५ निसें ४७ प्रतिशत मनू सीगु जोखिम दुगु खँ नं धयादीगु दु । विश्व स्वास्थ्य संगठन (डब्ल्यूएचओं) निपाह भाइरसपाखें सरे
जुइगु ल्वय्यात विश्वया झिगू प्राणघातक ल्वय् मध्ये छगू कथं नालातःगु खः ।

सम्बन्धित बुखँ

LEAVE YOUR COMMENTS