कम्युनिष्ट नेता शम्भुरामय ९८क्वःगु जन्मजयन्ती हन

येँ – नेपाल कम्युनिष्ट पार्टी (माले)या महासचिव सीपी मैनालीं नेपाःया कम्युनिष्ट आन्दोलनया अग्रज नेता शम्भुराम श्रेष्ठं याना वंगु आपालं बांबांलाःगु ज्या मध्ये नेपाःयात साम्राज्यवाद व विस्तारवादपाखें तापाक तयेगु निंतिं याःगु ज्या खः धयादीगु दु ।

नेपाःया वामपन्थी आन्दोलनया अग्रज नेता श्रेष्ठया ९८ क्वःगु जन्मजयन्तीया लसताय् पार्टीपाखें ग्वसाः ग्वःगु ज्याझ्वलय् मूपाहां थासं नवासें वय्कलं नेता श्रेष्ठं नेपाःयात साम्राज्यवाद व विस्तारवादपाखें तापाक तयातयेगु निंतिं हे सहलह ब्याकाच्वनादी धयादिल । नेता श्रेष्ठया विचाः थौंया इलय् नं उतिकं सान्दर्भिक जूगु वय्कलं धयादीगु दु ।

पार्टी पोलिटब्यूरो दुजः कृष्ण राणां लसकुस यानादीगु ज्याझ्वलय् नेता श्रेष्ठया छेँजःपिनिपाखें वय्कःया म्ह्याय् मधु श्रेष्ठं थः अबु नेपाःया राजनीतिइ व्यतित यानादीगु जीवनया कारणं थः मामं आपालं दुःख सीमाःगु खँ कनादीगु खः ।

पार्टी स्थायी कमिटीया दुजः कुमार बेल्वासें नेता श्रेष्ठ छम्ह महान नेता जूगु विचाः तयादिसें वय्कः नेपाःया राजनीतिक ख्यलय् जक चर्चित मजुसे अन्तर्राष्ट्रिय राजनीतिइ नं बांलाःगु सम्बन्ध दुम्ह व्यक्ति जूगु विचाः तयादीगु खः । नेता श्रेष्ठं चीनय् वनाः विश्व कम्युनिष्टया महान् नेता माओत्सेतुङलिसे देय्या राजनीतिया बारे नं विचार विमर्श यायेगु यानादीगु वय्कलं कनादिल ।

पार्टी केन्द्रीय दुजःलिसें ज्याझ्वःया सभापति सिद्धिलाल महर्जनं देय्या निंतिं त्याग यानाः थःगु जीवन हे जनताया निंतिं समर्पित याना वंपिं नेतातय्त ल्वःमंका वन धाःसा लिपाया पुस्तां झीत गबलें नं लुमंकीमखु धयादिल । ज्याझ्वलय् केबी घःजु, गोर्की श्रेष्ठ, हरिप्रसाद श्रेष्ठ लगायतया वक्तातय्सं नं नेता श्रेष्ठं नेपाःया राजनीतिइ बियादीगु योगदानयात कयाः थःथःगु नुगःखँ तयादीगु खः ।