भक्तपुर सहकारीया धिमे प्रशिक्षण क्वचाल
ख्वप(नेपालभाषा टाइम्स)- भक्तपुर बचत तथा ऋण सहकारी संस्थापाखें मिसातय्त लक्षित यानाः बिउगु प्यलायंकंया धिमे प्रशिक्षण क्वचाःगु दु । ज्याझ्वलय् धिमे प्रशिक्षणय् ब्वति कयादीपिं प्रशिक्षार्थीनापं संस्थापाखें ग्वसाः ग्वःगु छन्हुया लेखापालन व लेखापरीक्षण तालिमया नं समापन यासें ब्वति कयादीपिंत दसिपौ लःल्हाःगु खः ।
संस्थाया सांस्कृतिक उपसमितिया ग्वसालय् जूगु धिमे प्रशिक्षण समापन ज्याझ्वलय् संस्थाया अध्यक्ष बलराम प्रजापतिं लेखापालन, लेखापरीक्षण व धिमे प्रशिक्षणय् ब्वति कयादीपिंत दसिपौ लःल्हानादीगु खः ।
उगु इलय् संस्थाया अध्यक्ष प्रजापतिं संस्थाया लेखा नीति व निर्वाचन निर्देशिकाकथं थुकथंया तालिमया महत्व दुगु खँ कनादिल । लिसें वय्कलं मिसात नं हरेक क्षेत्रय् न्ह्याः वनेमाःगु आवश्यक दु धासें कला, संस्कृति संरक्षणया निंतिं थुकथया धिमे प्रशिक्षणं मिसातय्के उर्जा तनाबीगु विश्वास प्वंकादिल ।
भक्तपुर जिल्ला बचत तथा ऋण सहकारी संघया व्यवस्थापक बालकृष्ण ध्वँजूं आन्तरिक व बाह्य लेखापरीक्षण प्रक्रिया बारे जानकारी बियादीगु ज्याझ्वलय् सहायक व्यवस्थापक दयालक्ष्मी धन्छां नं लेखापालन व लेखापरीक्षणया थीथी पक्षयात कयाः नुगःखँ तयादीगु खः ।
उपसमितिया संयोजक नारायणी ख्वंजूं आर्थिकलिसें सांस्कृतिक क्षेत्रय् नं योगदान बीगु ल्याखं थुकथंया तालिम बिया वयाच्वंगु जानकारी बियादिसें संस्थापाखें आतकया दुने २७० म्ह स्वयां अप्वःसित बासुरि, भ्वाइलिन, धिमे, मगःखिं आदिया तालिम बीधुंगु जानकारी बियादिल ।
संस्थाया व्यवस्थापक सत्यनारायण साँयजू, धिमे गुरु पृथ्वीनारायण प्रजापति, नृत्य गुरु सन्देश प्रजापति, प्रशिक्षार्थी पंचरेखा प्रजापतिं नं नुगःखँ तयादीगु खः । धिमे प्रशिक्षणय् मुक्कं नीखुम्हेसिया सहभागिता दुगु खः ।
LEAVE YOUR COMMENTS