संसद न्ह्याकेत प्रमुख दलतलिसे थौं सहलह

येँ – प्रतिनिधि– सभाया म्हिगः बैठकय् नं एमाले सांसदतय्सं पंगः थनेवं बैठक अवरुद्ध जूगु दु । सभामुख अग्नी सापकोटां बैठक न्ह्याके हे मफयेवं कन्हय् तकया नितिं संसद स्थगित यानादीगु दु । नेकपा एमालें थःपिंसं कारबाही यानापिं झिंप्यम्ह सांसदयात संसदय् ब्वति कायेकल धाःसा प्रतिनिधिसभाया बैठक न्ह्याके मबीगु अडान कया वयाच्वंगु दु ।

थ्वहे झ्वलय् प्रधानमन्त्री शेरबहादुर देउवां संसद गबलेंनिसें न्ह्याइ धकाः एमाले अध्यक्ष केपी ओलीयात न्यनेत धयादीगु दु । म्हिगः बैठकं पिहां वःम्ह प्रमयात पत्रकारतय्सं आः संसद गबलये चले जुइ ले धकाः न्यंगु न्ह्यसःया लिसः बिसें वय्कलं धयादिल, ‘ओलीजीयाके हे न्यनादिसँ ।’

मेखे एमालेया संसदीय दलया उपनेता सुवास नेम्वाङं प्रतिनिधिसभाय् न्ह्यानाच्वंगु पंगः चीकेगु खःसा सभामुख व सत्तारुढ दलं कुतः यायेमाःगु खँ धयादीगु दु । वय्कलं एमाले शान्त जुल धाःसा फुक्कं खँ ठीक जुइ धासें धयादिल, ‘जसपाया हकय्, माओवादी केन्द्रया हकय् सांसदतय्त कारबाही याःगु सुचं बीवं सभामुखपाखें कारबाहीया सुचं जारी जुल, तर जिमिगु हकय् अथे छाय् मजुल, न्ह्यसः थ्व खः, जिमित शान्त यायेवं फुक्कं खँ पाय्छि जुइ ।

थ्वहे झ्वलय् सभामुख सापकोटां संसदय् ब्वलनाच्वंगु पंगः चीकेगु नितिं थौं शीर्ष नेतातय्त सहलहया नितिं सःतूगु दु । थौं २ बजे संसदय् दुपिं प्रमुख दलया शीर्ष नेतातय्त सहलहया नितिं सःतूगु खः । म्हिगः हे सभामुख सापकोटां प्रमुख प्रतिपक्ष दल एमालेया मुख्य सचेतक व सचेतक सहित सहलह यानादीगु खः ।