‘मेयरं गलत हल्ला यात’
येँ (नेपालभाषा टाइम्स)÷थनया न्हूसतकय् पार्किङ चीकेगु सवालय् येँ महानगरपालिकाया मेयर बालेन साहं थःगु बारे भ्रमपूर्ण खँ पित हयाच्वंगु दावी येँ २२ वडाया वडा अध्यक्ष चिनीकाजी महर्जनं धयादीगु दु । म्हिगः थःगु वडा ज्याकुथिइ हे छगू पत्रकार सम्मेलन यासें वय्कलं थ्व खँ धयादीगु खः ।
न्हूसतकय् जुयाच्वंगु सशुल्क पार्किङया ठेक्का म्याद क्वचाइगु जुइवं थम्हं अन ठेकेदारया म्याद थप यायेगु मखु बरु महानगरपालिका थम्हं हे पार्किङया व्यवस्था यायेगु धकाः मेयरयात सुझाव बियागु खँ वय्कलं कनादिल ।
वय्कलं धयादिल, ‘पार्किङया म्याद क्वचायेत्यंगु दु, आः छु यायेगु धकाः मेयरजुं जिके न्यंगु खः । जिं ठेक्का रिन्यु यायेम्वाः तर पार्किङ झीसं हे सञ्चालन यायेगु जुइ धयागु खः । तर वय्कलं थ्व खँयात पूवंक मकँसे जिलिसे सल्लाह यानाः हे पार्किङ चीकागु धकाः हल्ला यानादिल । थ्व भ्रम जक खः ।’
थ्व थासय् न्हापा स्मार्ट पार्किङया नामय् सशुल्क पार्किङ शुरु याःबलय् थः उगु समारोहय् उपस्थित तकं मजुयागु खँ कँसें वय्कलं धयादिल, ‘जनतायात सुविधाजनक पार्किङ माः धइगु पक्षय् जि दु । पार्किङया नामय् ध्यबा कमे यायेगु ज्या याये मजिउ धकाः जि लगे जुयागु खः ।’
महानगरयाके प्रशस्त नगर प्रहरी दुगु जुयाः नगर प्रहरी लगे यानाः हे पार्किङ सञ्चालन याये फइगु व थम्हं मेयर साहयात नं थ्वहे सुझाव बियागु खँ कनादिल ।
थःगु वडायात मनपां याःगु व्यवहारं यानाः थौं २२ वडा केन्द्रपाखें अलग जू थें महसुस जुयाच्वंगु खँ नं वय्कलं कनादिल । न्यूरोड धइगु दशकौं तक मेहनत यानाः निर्माण जूगु बजार खः धासें थन ग्राहकया लागिं सुविधा बढे यानाः यंकेमाःथाय् अःखतं दुगु सुविधा नं चीकेगु ज्या जूगु दु धयादिल ।
येँय् कालोपत्रे यानातःगु सतकय् पार्किङ याये मजिउ धकाः चर्चा याःसां थ्व गलत खः धासें वय्कलं धयादिल, ‘संसारया फुक्क प्रमुख शहर वाशिंगटन, सिड्नी थासय् कालोपत्रे जुयाच्वंगु सतकय् हे पार्किङ यानातःगु दुु, अन लोकप्रिय नं जुयाच्वंगु दु । मखुसा गुगल सर्च यानाः स्वयादीसां जिउ ।’
येँया मेयर बालेन साहं यानादीगु फुक्क भिंगु ज्यायात थःपिंसं समर्थन हे यानागु खँ कँसें तर मेयरं धाःसा थःपिंत सहयोग मयाःगु दावी नं यानादिल ।
पत्रकार सम्मेलनय् न्हूसतकया पसल्यातय्सं नं थःगु दुःख प्वंकूगु खः । स्थानीय व्यापारी सागर शाक्यं न्हू सतकय् फुक्क सुविधा दु धकाः हे मनूतय्सं छेँबुँ बह्रः तयाः त्यासा कयाः थन पसः चायेकः वइगु खः धासें पार्किङ सुविधा हे कटौती जूगुलिं आः पसल्यात थन च्वनेगु लाकि वनेगु जुयाच्वंगु दु धयादिल ।
स्थानीयवासी राधाकृष्ण महर्जनं न्हूसतकय् छगू लाइन पार्किङ यायेमाः धकाः स्थानीयवासीतय्सं हे वडायात इनाप यानागु खँ कँसें वडाध्यक्षयाके न्यनाः हे थ्व ज्या यानागु धकाः मेयरं थःपिंत झंगः लाःगु खँ नं कनादिल ।
न्हूसतकय् पार्किङ चीकूगु विरुद्ध नेपाली कांग्रेस, नेकपा (एमाले), नेकपा (माओवादी) व जसपाया स्थानीय २२ वडा कमिटीपाखें नं मंकाः विज्ञप्ति पिकयाः विरोध याःगु दु । अथे हे अनया खिचापोखरी न्यूरोड व्यापार संघ, नेपाल व्यापार संघ, राष्ट्रिय व्यापार संघ, एकता व्यापार संघ, रंजना व्यापार संघ, विशाल बजार व्यापार संघ आदिपिंसं नं मंकाः कथं विरोध याःगु दु ।
LEAVE YOUR COMMENTS