दुर्घटनाया कारण बारे विवाद ,नेपाः व बंगलादेशं छगुलिं मेगुयात द्वपं बीगु याना हल

येँ – म्हीग येँय् जूगु बंगलादेशया विमान दुर्घटनाय् खास दोष सुयागु दु धइगु खँय् नेपाः व बंगलादेशया हवाई अधिकारीतय् दथुइ विवाद शुरु जूगु दु । नेपालं एअर कन्ट्रोलरं बिउगु निर्देशनयात पाइलटं पालना मयाःगुलिं दुर्घटना जूगु खः धयाच्वंगु दुसा बंगलादेशं एयर ट्राफिक कन्ट्रोलं गलत सूचना बिउगुलिं विमान दुर्घटना जूगु द्वपं बिउगु दु । युएस बंगला विमान कम्पनीं थ्व दावी याना हःगु खः । विमान दुर्घटना जूगु छुं ई लिपा कम्पनीया प्रमुख कार्यकारी अधिकृत इमराज आसिफं त्रिभुवन विमानस्थलया एटिसीं लगत सूचना बिउगु हुनिं विमान दुर्घटना जूगु दावी याःगु खः । आसिफं विमान व एटिसि दथुइ जूगु संवादय् नं एटिसिया हे गल्ती खनेदुगु खँ धाःगु दु । स्वंगू मिनेट दुने तःक्वः हे चालकयात निर्देशन बिउगुलिं चालकं विमान गनं ल्याण्डिङ यायेगु धइगु खँय् अलमल जुयाः दुर्घटना जूगु दावी नं आसिफं याःगु दु ।

‘एटिसिं जिमिगु पाइलटयात मिस गाइड यात, उमिसं रनवेलय् गन ल्यान्ड यायेगु धइगु सही सुचं कायेमखन ।’ आसिफं धाःगु दु । विमानय् गुगुं नं कथंया प्राविधिक गडबडी मजूगु दावी यासें आसिफं धाल ‘जिमिगु जानकारी कथं दुर्घटनाय् एटिसिया लापरवाही दु, जिमिगु पाइलटपाखें मखु ।’तर नेपाःया एटिसिं धाःसा ख्याच्वः लिपा नं विमान गलत थासं ल्याण्डिङ याःगुलिं दुर्घटना जूगु दावी याःगु दु । एटिसीं दुर्घटना न्ह्यः चालक लिसें याःगु संवादया अडियो रेकर्ड तकं सार्वजनिक याःगु दु ।
विमानस्थलया प्रवक्ता प्रेमनाथ ठाकुरं विमान नियमित रुट स्वयां बिस्कं लँपुं अवतरण यायेत स्वःगु इलय् दुर्घटना जूगु दावी याःगु दु ।दुर्घटना न्ह्यः विमान चालक व एअर कन्ट्रोलर दथुइ जूगु संवादया टेप तकं नेपाःया सञ्चार माध्यमतय्सं सार्वजनिक याना बीधुंकूगु दु । उकी नेपाःया कन्ट्रोलरं छथाय् धयां मेथाय् वनाच्वन धकाः खँ ल्हाःगु तायेदु ।

दुर्घटनाग्रस्त विमानया चालक धाःसा जीवित दनिगु खँ नं थ्वया दथुइ पिहां वःगु दु । काठमाडौं मेडिकल कलेजय् वासः याकातःम्ह उम्ह पाइलट शुरुइ सु खः धकाः म्हमसियाच्वंगु खःसा आः वय्कः हे मुख्यम्ह पाइलट खः धइगु सीदुगु दु । मेपिं निम्ह कोपाइलट धाःसा सीदुगु दु । पाइलट हे जीवित दनिगु कारणं दुर्घटनाया तथ्य याकनं वइगु आशा यानातःगु दु ।
थ्वहे झ्वलय् दुर्घटना जूगु विमानया अवस्था बारे जानकारी कायेत बंगलादेशया उच्चस्तरीय सरकारी प्रतिनिधि मण्डल म्हिगः येँ थ्यंकः वःगु दु । बंगलादेशया नागरिक उड्डयन मन्त्री एकेएम शाहजान कमल व परराष्ट्र राज्यमन्त्री शाहरिर अलाम लगायत थीथी पदाधिकारी नेपाः वःगु खः । उगु पुचलय् दुर्घटनाय् लाःपिनि छेँजः नं दुथ्याः ।