भिंद्यः जात्रायात आर्थिक ग्वाहालि
यल- यल महानगरपालिका वडा नं. १६ पाखें थनया अतिकं नांजाःगु धार्मिक सांस्कृतिक महत्वया भिंद्यः जात्राया निंतिं आर्थिक ग्वाहालि याःगु दु । यल मनपा १६ वडापाखें भिंद्यः जात्राया निंतिं न्यागू लख तका आर्थिक ग्वाहालि याःगु खः । थनया थीथी धार्मिक, सांस्कृतिक सम्पदायात आर्थिक ग्वाहालि याना वयाच्वंगु वडापाखें अमूर्त सांस्कृतिक सम्पदा संरक्षणया निंतिं उकथं आर्थिक ग्वाहालि याःगु खः ।
यल मनपा १६ वडाअध्यक्ष निर्मलरत्न शाक्यं भिंद्यः जात्राया निंतिं मंगल टोल सुधार संघया अध्यक्ष किरणमान प्रधानयात चेक लःल्हानादीगु खः । चेक लःल्हायेगु ज्याझ्वलय् वडाअध्यक्ष शाक्यं अमूर्त सांस्कृतिक सम्पदा संरक्षणया निंतिं सम्वद्ध गुथि, गुथियार, सरोकारवाला निकायलिसे समन्वय यायेगु ल्याखं अक्षय कोष स्थापनार्थ वडापाखें ग्वाहालि याना वयाच्वनागु जानकारी बियादिल ।
लिसें वय्कलं थुकथंया ग्वाहालिपाखें लोप जुया वनेत्यंगु व संरक्षण यायेमाःगु सांस्कृतिक सम्पदात क्रियाशील याना यंकेगु निंतिं हःपाः जुइगु व सरोकारवालातय्त नं उत्साहित यायेगु ज्या जुइगु विश्वास प्वंकादिल ।
संघया अध्यक्ष प्रधानं दँय्दसं थनया मंगलबजारय् जुइगु मेला व भिंद्यःया जात्राय् द्वलंद्वःया ल्याखय् भक्तजनतय् सहभागिता दइगु व आवश्यक मात्राय् स्वयंसेवक तकं परिचालन जुइगुलिं खर्च यक्व माःगु खःसां वडापाखें प्राप्त आर्थिक ग्वाहालिपाखें ब्याज जक खर्च यायेगु जानकारी बियादिल ।
LEAVE YOUR COMMENTS