छत्रपाति चिकित्सालयय् डिजिटल एक्स–रे मेसिन जडान

येँ ( छत्रपाति निःशुल्क चिकित्सालयय् अत्याधुनिक पूर्ण डिजिटल एक्स–रे मेसिन जडान यानाः सेवा बीगु शुरु याःगु दु । चिकित्सालयय् जडान याःगु उगु अत्याधुनिक एक्स–रे मेसिनया वंगु शनिवाः छगू ज्याझ्वःया दथुइ नेपाल मेडिकल काउन्सिलया अध्यक्ष डा. भगवान कोइरालां उलेज्या यानादीगु खः ।

चिनिया कम्पनी माइन्ड रें उत्पादन याःगु उगु एक्स–रे मेसिन चिकित्सालययात ग्वाहालिकथं प्रदान याःगु खः । न्हू जडान याःगु मेसिनया उलेज्या यासें काउन्सिलया अध्यक्ष डा. कोइरालां समुदायस्तरय् चायेकूगु थुकथंया चिकित्सालयं अत्याधुनिक मेसिन जडानं सेवाग्राही व जनतायात सर्वसुलभ व निःशुल्क सेवापाखें लाभान्वित जुइ धयादिल । चिकित्सालयया अध्यक्ष डा. मनोजमान श्रेष्ठं चिकित्सालयय् डिजिटल प्रविधिया सेवा शुरुलिसें मेमेगु सेवा नं थप प्रभावकारी जुया वनी धयादिल ।

‘ततःधंगु अस्पतालय् जक जडान जुइगु थुकथंया मेसिन चिकित्सालयय् जडान यानाः प्रयोग यायेगु ज्यां सेवाग्राहीयात बिया वयाच्वनागु स्वास्थ्य सेवाय् छुं नं कथंया कमी वइमखु’ अध्यक्ष श्रेष्ठं धयादिल ।
वय्कलं चिकित्सालयय् अल्ट्रा साउन्डलिसें मेमेगु सेवा नं अत्याधुनिक प्रविधिया प्रयोग जुयाच्वंगु जानकारी बियादिसें याकनं हे चिकित्सालयय् न्हिं १०० गः अक्सिजन सिलिन्डर उत्पादन याये फइगु प्लान्ट जडान यायेत्यनागु नं जानकारी बियादिल ।

अथे हे याकनं हे अस्पतालया न्हूगु भवन निर्माणया निंतिं नं शिलान्यास जुइत्यंगु खँ कनादिसें उकिया निंतिं सकसिनं ग्वाहालि यायेत नं इनाप यानादिल ।