प्रधानन्यायाधीशय् जोशी अस्वीकृत

येँ – संसदीय सुनुवाई विशेष समितिं कामु प्रधानन्यायाधीश दीपकराज जोशीयात प्रधानन्यायाधीश दयेकेत अस्वीकृत याःगु दु । शुक्रवाः समितिं ऐतिहासिक निर्णय यासें जोशीयात प्रधानन्यायाधीश मदयेकेगु क्वःछिउगु खः । समितिं सुनुवाई याःपिं मध्ये छुं नं पदय् थथे अस्वीकृति याःगु थ्व हे न्हापांखुसी खः ।

शुक्रवाः जूगु समितिया बैठकय् नेपाली कांग्रेसया सांसदतय्त बैठक बहिष्कार याःसां दुई तिहाइ बहुमतया आधारय् जोशीयात अस्वीकृत याःगु खः । संवैधानिक व्यवस्था कथं दुईतिहाइ बहुमतं जक समितिं अस्वीकृत यायेदइ ।

बैठकय् नेकपाया गुम्ह व संघीय समाजवादी फोरमया छम्हेसिनं जोशीयात प्रधानन्यायाधीश दयेके मजिउगु धकाः मतदान याःगु खःसा कांग्रेसं बैठक बहिष्कार याःगुलिं जोशीया पक्षय् छकू नं मत मलाःगु खः । तर कांग्रेसं दुई तिहाइ बहुमतया बलं अदालतय् हस्तक्षेप यायेमाजिउ धकाः लिखित रुपं च्वयाः बैठक बहिष्कार याःगु खः ।

समितिया अध्यक्षता यानाच्वंम्ह फोरमया लक्ष्मणलाल कर्ण धाःसा अध्यक्ष जूगुलिं मतदान मयाःगु खः ।