समाचार साभारप्रति काउन्सिलया ध्यानाकर्षण

येँ – प्रेस काउन्सिल नेपालं समाचार व समाचार सामग्री साभार मयायेत संचार माध्यमयात इनाप याःगु दु । काउन्सिलं विना अनुमति व विश्वसनीयताया परीक्षण मयासे छुं नं कथंया समाचार व समाचार सामग्री साभार मयायेत व मयाकेत संचारमाध्यमयात ध्यानाकर्षण याकूगु दु ।

गुगुं छगू संचार माध्यमं तयार याःगु समाचार व समाचार सामग्री मेगु संचारमाध्यमं नं गथे खः अथे हे साभार याःगुलिं थःपिंत लिच्वः लाःगु धकाः धासें राष्ट्रिय समाचारा समिति (रासस) लगायत मेमेगु संचार माध्यमं याःगु उजुरीं थःपिनिगु ध्यानाकर्षण जूगु काउन्सिलं न्ह्यथंगु दु ।

काउन्सिलं याःगु लिपांगु अनुगमन व अभिलेखकथं समाचार सामग्री तयार यायेगु झ्वलय् उकथं समाचार सामग्री साभार यायेगु ज्याय् दकलय् न्ह्यःने अनलाइन संचार माध्यमत लानाच्वंगु काउन्सिलं न्ह्यथंगु दु । अथे हे गुलिखे संचारमाध्यमं थःपिनिगु मौलिक समाचार व समाचार सामग्री विना अनुमति सम्प्रेषण यायेगु यानाच्वंगुलिं थःपिंत उकिया लिच्वः लानाच्वंगुलिं अज्याःगु ज्या मयायेत सार्वजनिक सुचं तकं जारी याःगु दु ।

थुकथं विना अनुमति समाचार वा समाचार सामग्री साभार यायेगु ज्या पत्रकार आचारसंहिता २०७३ अःखः जूगु काउन्सिलया सूचना अधिकारी दीपक खनालं जारी यानादीगु विज्ञप्तीइ धयातःगु दु ।