मोहनि तकया दुने ३३ प्रतिशतयात खोप

येँ- स्वास्थ्य राज्यमन्त्री उमेश श्रेष्ठं सरकारं थ्वहे वइगु मोहनि तकया दुने ३३ प्रतिशत जनतायात कोभिड विरुद्धया खोप बीगु योजना दुगु खँ धयादीगु दु । थनिंनिसें न्ह्याइगु विश्व स्वास्थ्य संगठनया दक्षिण पूर्वी एसिया क्षेत्रया सम्मेलन बारे जानकारी बीत म्हिगः ग्वसाः ग्वःगु पत्रकार सम्मेलनय् न्ववासें वय्कलं उगु खँ धयादीगु खः ।

वय्कःया कथं नेपाःया फुक्कं नागरिकयात खोप बीगु लागिं मुक्कं ५ करोड ५० लाख खोप आवश्यक जू । थुकी मध्ये १ करोड ४ लाख खोप बीधुंकूगु दु । न्हापांगु डोज १८ प्रतिशतं कायेधुंकूगु दु्सा १५ प्रतिशतं पूर्ण डोज कायेधुंकूगु दु । वय्कलं धयादिल, ‘मोहनि तकया दुने २ करोड ५ लाख डोज खोप न्ह्याथें यानाः जूसां हयेगु जुइ । आः वइगु झिन्हुया दुने ४४ लाख भेरोसेल डोज वइगु जुयाच्वंगु दु ।’
उकथं हे वय्कलं मस्तय्गु नितिं ४० लाख मोडर्ना व ६० लाख फाइजर खोप हयेगु तयारी जुयाच्वंगु खँ नं कनादिल । वय्कलं मोडर्नाया नितिं माःगु ध्यबा पुलेधुनागु जानकारी नं बियादीगु दु ।

थ्वहे झ्वलय् म्हिगः देय्न्यंकं १५३४ म्ह कोरोना संक्रमणं मुक्त जूगु दु । स्वास्थ्य तथा जनसंख्या मन्त्रालयं देय्न्यंकं डिस्चार्ज जूपिनिगु ल्याः पितबिउगु खः । थुकिया लिसें कोरोना संक्रमणं मुक्त जूपिनिगु ल्याः ७ लाख २७ हजार १८५ म्ह थ्यंगु दु ।

उकथं हे म्हिगः जक ७,९७१ म्हेसिया परीक्षण यायेगु झ्वलय् १०८९ म्ह न्हूपिं संक्रमित थपे जूगु दु । थुकिया लिसें नेपालय् कोरोना संक्रमित जूपिनिगु ल्याः ७ लाख ६९ हजार २७१ म्ह थ्यंगु दु । अथे हे कोरोना संक्रमणं सीपिनिगु ल्याः १० हजार ८३८ म्ह थ्यंगु दु ।

वंगु छुं न्हि न्ह्यवंनिसें कोरोना संक्रमित मनूतय् ल्याः अप्वयाच्वंसां नं सरकारं मोहनि थेंज्याःगु नखःचखः न्ह्यःने वयाच्वंगुलिं निषेधाज्ञा चीका बीधुंकूगु दु ।