माधव पक्षय् वंपिं सांसदतय् पद बचे जुल

येँ – नेकपा एमालें माधव नेपाल लगायत झिंप्यम्ह सांसदयात कारवाहीया नितिं संसद सचिवालय छ्वःगु पौया बारे संसद सचिवालयं म्हिगः निर्णय याःगु दु । सचिवालयं म्हिगः थःगु निष्कर्ष पिकायेगु झ्वलय् माधव नेपाल पुचःयात निर्वाचन आयोगं न्हूगु दलया मान्यता बीधुंकूगुलिं आः उमित कारबाही यायेम्वाःगु धकाः निर्णय याःगु खः ।

नेपाल पुचलं न्हूगु दल दर्ता यायेत्यंगु इलय् एमालें झिंप्यम्ह सांसदयात पदमुक्त यायेगु निर्णय यासें संसद सचिवालयय् पौ छ्वःगु खः । तर सभामुख अग्निप्रसाद सापकोटां उगु पौयात कयाः कारबाही मन्ह्याकुसें थाकातःगु खः । सभामुखं तत्काल कारबाही मयाःगु धासें एमालें असन्तुष्टि प्वंकेगु लिसें निक्वः तक सभामुखया चेम्बरय् धर्ना तकं बिउगु खः ।

थ्व स्वयां न्ह्यः संसद सचिवालयं कारबाही याःपिं सांसदत एमालेयापिं हे सांसद जूगु व एमालें छ्वयाहःगु पौ विचाराधीन अवस्थाय् दुगु धासें निर्वाचन आयोगयात पौ च्वयेधुंकाः उकिया आधारय् आयोगं सनाखत यानाः नेपाल पक्षयात न्हूगु दलया मान्यता बिउगु खः । नेपाल पुचलं दल दर्ताया मान्यता कायेधुंकाः सांसदपिंत कारबाही यायेमाःगु अवस्था मवःगु निर्णय नं सचिवालयं याःगु दु । थुकथं माधव पक्षया सकलें सांसदया पद बचे जूगु दु ।

सम्बन्धित बुखँ

LEAVE YOUR COMMENTS