ने. सं. ११४३ तछलाथ्व त्रयोदशी -

सामाजिक संजालया विज्ञापनं राजस्व छखे

येँ – प्रविधिया विकासलिसें इन्टरनेट प्रयोगकर्ताया ल्याः नं अप्वया वनाच्वंगु दु । इन्टरनेट प्रयोगकर्ता अप्वःगुयालिसें लिपांगु इलय् इन्टरनेटपाखें टेलिफोन सेवा प्रदान याइगु भाइबर, मेसेन्जर, स्काइप, ह्वाट्सएप, वीच्याट, इमो, गुगल मिट थेंज्याःगु एप्सया प्रयोग नं अप्वयाच्वंगु दु ।

थुकथंया संजालया प्रयोग व्यक्तिगत रुपं जक अप्वयाच्वंगु जक मखसे थज्याःगु प्रविधिया माध्यमं थौंकन्हय् सभा, समारोह, गोष्ठि, मुँज्या, वेबिनार, बैठक तकं संचालन यायेगु याना हयाच्वंगु दु । थज्याःगु संजालया प्रयोगकर्ताया ल्याः नं न्हियान्हिथं धइथें अप्वया वनाच्वंगु दु ।

सूचना प्रविधिया थुकथंया संजालया विकास व थुकिया प्रयोगं विश्वयात हे छगू चिधंगु गांया रुप् सीमित याना बिउगु दु । इन्टरनेटया पहुँच व थुकथंया संजालया प्रयोग व विकासं न्हियान्हिथंया मानव जीवनयात नं सहज याना बिउगु दु ।

मनूतय् न्हिथंया जीवनशैलीयात सहज याना बिउसां थुकिया प्रयोगं प्राप्त जुइमाःगु सरकारी राजस्व धाःसा छखे लानाच्वंगु दु । महालेखा परीक्षकया ज्याकुथिं सामाजिक संजाल व थीथी एप्सया प्रयोग व उकी जुइगु विज्ञापन व मेमेगु व्यावसायिक ज्याया जानकारी सरकारी निकाययात मदइगु स्पष्ट यासें थुकी सरकारी राजस्व नं छखे लानाच्वंगु खँ धाःगु दु ।

नेपालय् अनेकथंया एप्स निर्वाध रुपय् संचालन जुयाच्वंगु जुयाच्वंगु जक मखसे उकियापाखें थीथी ज्याझ्वःत नं जुयाच्वंगु दु । अथे हे अज्याःगु एप्सय् थीथी व्यावसायिक प्रयोजनया निंतिं विज्ञापन यानाच्वंगु दु । गुलिखे सेवाया निंतिं अमेरिकी डलरया खातापाखें भुक्तानी जुयाच्वंगु व थुकथंया भुक्तानी प्रक्रियाया निंतिं नेपालय् गुगुं नं प्रणालीइ दर्ता मजूगुलिं करया दायराय् तकं वये मफुगु महालेखाया निष्कर्ष दु ।

छखे डलरपाखें जुइगु भुक्तानीया विवरण सरकारयात जानकारी मदइगु व मेखे राजस्वया दायराय् तकं मवःगु धासें उकथंया सेवा प्रदान याइगु सेवा प्रदायकयात नेपालय् दर्ता याकाः राजस्व असुलया व्यवस्था यायेमाःगु महालेखाया ठहर दु ।

महालेखा परीक्षकया ज्याकुथिं आः नकतिनि तयार याःगु ५८ क्वःगु प्रतिवेदनय् उगु खँ न्ह्यथनातःगु खः । महालेखां डलर भुक्तानीया विवरण नं सी मदइगु व राजस्वया दायराय् नं मवःगु धासें आपत्ति नं प्वंकूगु दु । लिसें अज्याःगु सेवा प्रदायक ख्यःयात करया दायराय् हयेत महालेखा सरकारयात निर्देशन नं बिउगु दु ।