प्यसःम्ह नक्कली भूटानी शरणार्थी अमेरिका थ्यनेधुंकूगु ओलीया दावी
येँ (नेपालभाषा टाइम्स)÷ नेकपा एमालेया अध्यक्ष केपी ओलीं नक्कली भूटानी शरणार्थी जुयाः प्यसःम्ह मनूत अमेरिका वनेधुंकूगु दावी याःगु दु । अध्यक्ष ओलीं एमाले केन्द्रीय कमिटीया बैठकय् थ्व दावी याःगु खँ बैठकय् सहभागी नेतातय्सं धाःगु दु । बिहिवाः निसें सुरु जूगु बैठकय् आक्रामक ढंगं वःम्ह ओलीं भ्रष्टाचारया विषययात राजनीतिक ब्वला सायेगु विषय दयेकूगु धासें नक्कली भूटानी शरणार्थी काण्डय् निर्दोषयात फसे यायेगु ज्या जुयाच्वंगु धकाः धाःगु खः ।
थ्व काण्डय् प्रहरीं पक्राउ पुर्जी जारी यानातःम्ह एमालेया सचिव टोपबहादुर रायमाझी अझं फरार जुयाच्वंगु दनि । रायमाझीयात एमालें निलम्बन यायेधुंकूगु दु, अथेखःसां अध्यक्ष ओली रायमाझीयात बचे यायेत लगे जुयाच्वंगु दु ।
ओलीं बैठकय् न्ववायेगु ववायेगु झ्वलय् प्यसःम्ह नक्कली शरणार्थीत अमेरिका थ्यनेधुंकूगु थःत जानकारी वःगु धासें वंगु जेठ महिनाय् पीडिततय्त ध्यबा लित बियाः मुद्दा मिले यायेगु कुतः याःगु खँ नं थःम्ह सिउगु खँ धाःगु खः । ‘उबलय् सु प्रधानमन्त्री खः ? गृहमन्त्री सु खः, थ्व दुनियाँ स्यू’ बैठकं आक्रोसित ओलीं धाःगु खः ।
ओलीं धाःगु इलय् कांग्रेस सभापति शेरबहादुर देउवा प्रधानमन्त्री जुयाच्वंगु खःसा बालकृष्ण खाण गृहमन्त्री जुयाच्वंगु खः । खाणयात नक्कली भूटानी शरणार्थी काण्डय् ल्हाः दुगु द्वपनय् ज्वनेधुंकूगु दु ।
ओलीं थ्व काण्डयात कयाः जेठ ४ गते संसदय् न्ववायेगु धयाच्वंगु दु । एमालेया प्रमुख सचेतक पद्म गिरीं थ्व विषयय् ओली संसदय् थप खँ तयेफुगु खँ धाःगु दु ।
अध्यक्ष ओलीं थ्व बारे सदनय् न्ववायेगु धयाच्वंगु व थ्व बारे थःपिंसं थीथी ढंगं सूचं मुंकाच्वनागु खँ सचेतक गिरीं धाःगु दु । गिरीं ताःई न्ह्यवनिसें हे संगठीत रुपं हे थ्व ज्या जुयाच्वंगु सुचं थःपिंत वयाच्वंगु खँ नं धाःगु दु । सचेतक गिरीं थ्व काण्डय् दुने थ्यंक दुहां वनाः स्वतन्त्र अनुसन्धान यायेत थःगु दलया समर्थन दइगु खँ नं धाःगु दु ।
LEAVE YOUR COMMENTS