पुखू ल्यंकेत जनताया हस्ताक्षर

सार्वजनिक पुखुली अबुया सालिक तयेगु कुतः

किपू – थनया निगू ऐतिहासिक पुखू बचे यायेगु निंतिं स्थानीय जनतां हस्ताक्षर संकलन शुरु याइगु जूगु दु । न्हापा सार्वजनिक जुयाच्वंगु पाँगाया निगू पुखूयात २०४२ सालय् चोभारय् च्वनीम्ह छम्ह मनुखं जुुजुपाखें हुकुम प्रमाङ्गी कयाः थःगु नामय् याना काःगु खःसा आः उकियात पुनः सार्वजनिक हे कायम यायेत थ्व अभियान न्ह्याकेत्यंगु खः ।

पुखू खःसां लः मदयेधुंकूगु उगु ख्यलय् केसी थर दुम्ह उम्ह मनुखं बुँज्या यायेत स्वःगु खःसा स्थानीय जनतां विरोध यानाः बुँज्या याके मबिउगु खः । आः केसी मदयेधुंकाः वया कायपिंसं उगु पुखूयात सार्वजनिक यानाः अन थः अबुया सालिक तयेगु प्रस्ताव छ्वयाहःगु खः ।

तर स्थानीय जनतां न्हापा हे सार्वजनिक जुयाच्वंगु पुखुली सुयां सालिक तयेके बी मखु धासें पुखूयात सार्वजनिक हे कायम याकेगु अभियान शुरु जूगु खँ थुकिया अभियन्ता लिसें उपन्यासकार नजरराम महर्जनं ‘नेपालभाषा टाइम्स’ यात कनादीगु दु ।

किपू नगरपालिका ५ वडाय् लाःगु कित्ता नम्बर १९ या उगु पुखू ५ रोपनी ११ आना क्षेत्रफलय् न्यनाच्वंगु दुसा मेगु कित्ता नं. १०७ या मेगु पुखू ७ रोपनी २ आना जग्गाय् न्यनाच्वंगु दु । निगुलिं पुखूया नापी शाखा कलंकीया फिल्डबुकय् नं पुखू धकाः हे उल्लेख जुयाच्वंगु जानकारी बिसें महर्जनं पर्ति जग्गा जूगुलिं हे उमिसं भोगचलन यायेगु आँट मयाःगु खँ कनादिल ।

न्हापांनिसें स्थानीय जनतां हे उगु पुखूया संरक्षण यानाच्वंगु जुयाः आः अन सुयां सालिक तयेगुया औचित्य मदुगु खँ नं वय्कलं कनादिल । पुखू बचे यायेगु लागिं किपू नगरपालिकां खास हे पहल मयाःगु द्वपं नं वय्कलं बियादिल । आः हस्ताक्षर संकलन लिपा उगु हस्ताक्षर भूमि सुधार, कृषि तथा सहकारी मन्त्रालययात लःल्हायेगु तयारी जुयाच्वंगु दु ।

सम्बन्धित बुखँ

LEAVE YOUR COMMENTS