दम्बोचुक एकीकृत वस्ती बारे सहलह

येँ – तःभुखाचं क्षतिग्रस्त याःगु येँ मनपा १८ वडास्थित दम्बोचुकय् एकीकृत वस्ती विकास यायेगु लागिं आः येँ मनपा लगायत राष्ट्रिय पुनर्निर्माण प्राधिकरण नं सहभागी जुइगु जूगु दु । थुकिया लागिं स्थानीय किलांक्व दम्बोचुक सामूहिक आवास परियोजना नं गठन यानातःगु दु ।

ज्या न्ह्यःने न्ह्याकेगु लागिं आः स्वंगुलिं पक्षया दथुइ मंकाः सहमति यायेगु तयारी जुयाच्वंगु खँ सीदुगु दु । म्हीग थ्व स्वंगुलिं पक्षया दथुइ येँ मनपा ज्याकुथी मंकाः बैठक जूगु खः । सूत्रतय्सं धाः कथं दम्बोचुकय् एकीकृत वस्ती विकास यायेगु लागिं स्वंगुलिं पक्ष सहमत जुइधुंकूगु दुसा सहमतिया लागिं स्वंगुलिं पक्ष दुथ्याःगु सहमति पत्रया मस्यौदा नं तयार जुइधुंकूगु दु ।

दम्बोचुका ५४ खा छेँपाखें ५९ कित्तायात आः छगू हे परियोजना कथं विकास याना यंकेत थ्व कुतः जुयाच्वंगु खः । फुक्क कित्ता यायेबलय् अन करिब स्वंगू रोपनी जग्गा दु । सूत्रतय्सं धाः कथं थ्व ज्याया लागिं आवश्यक जुइगु लगानीया लागिं राष्ट्र बैंकलिसे खँ ल्हायेगु नं तयारी जुयाच्वंगु दु ।

राष्ट्र बैंकपाखें भुखाय् पीडितयात बीगु धयातःगु कम ब्याजदरया त्यासा कयाः थ्व परियोजना न्ह्याकेगु तयारी जुयाच्वंगु खःसां राष्ट्र बैंकं अज्याःगु सहुलियत दरया ब्याज केवल निदँया लागिं जक बीगु धाःगु कारणं दम्बोचुकया एकीकृत विकास परियोजना नं प्रभावित जुयाच्वंगु दु ।

म्हीग जूगु बैठकय् येँ मनपाया मेयर व पुनर्निर्माण प्राधिकरणया सीईओ सुशील ज्ञवालीपिंसं परियोजनायात सकारात्मक रुपं कासें उकियात न्ह्यःने न्ह्याकेगु बारे सहलह यानादीगु खः ।