बागमती प्रदेशय् नेवाः भाय् लागू यायेत माग

येँ – बागमती प्रदेशय् नेवाः भाय्यात नं सम्पर्क भाषाया मान्यता बीत इनाप याःगु दु । बागमती प्रदेशया न्हूम्ह मुख्यमन्त्री जुयादीम्ह अष्टलक्ष्मी शाक्ययात भिंतुना देछासें नेवाः पत्रकार राष्ट्रिय दबू येँ जिल्ला शाखापाखें थ्व माग न्ह्यब्वःगु खः । शनिवाः दबू येँ जिल्ला शाखापाखें मुख्यमन्त्री शाक्ययात ख्येँ सगं बियाः भिंतुना देछायेगु लिसें अभिनन्दन पौ लःल्हाःगु खः । थ्व झ्वलय् न्हूम्ह मुख्यमन्त्रीयात छगू ज्ञापनपत्र नं लःल्हासें थीथी माग तःगु खः ।

नेवाः राष्ट्रिय पत्रकार दबू येँ जिल्ला शाखाया नायः अर्बिन्द्रमान सिं नं अभिनन्दन पत्र व ज्ञापनपत्र लःल्हानादीगु खः । ज्ञापनपत्रय् बागमती प्रदेशय् नेवाःया भाय्यात सम्पर्क भाय् दयेकेगु लिसें प्रदेशस्तरीय नेवाः प्रेस काउन्सिल दयेकेत, नेपालभाषा लिसें मेमेगु आदिबासी जनजातिया भाषां संचालन जुयाच्वंगु मिडियायात प्रदेश सरकारपाखें अनुदान बीत, नेवाः पत्रकारतय् शीप व दक्षता विकास यायेत अक्षय कोष स्थापना यायेत, येँ महानगरपालिकापाखें येँ मनपा दुने नेपालभाषां स्थानीय पाठ्यक्रम लागू याःथें प्रदेशया मेमेगु जिल्लाय् नं स्थानीय भासं आखः ब्वनेगु वातावरण दयेकेमाःगु, अथेहे स्वनिगलय् कक्षा ९ निसं १२ तक नेपालभाषा ब्वंकेगु व्यवस्था यायेमाःगु खँ न्ह्यथनातःगु दु ।

ज्ञापनपत्र लःल्हाना कयादिसें मुख्यमन्त्री शाक्यं मातृभाषा पत्रकारिता विकासया निंतिं प्रदेश सरकारं तिबः बीगु धासें मेमेगु माग व सुझाव बारे नं अध्ययन यानाः निर्णय यायेगु खँ धयादीगु खः ।