महानगरया ग्वाहालिं छत्रपाटी चिकित्सालयय् विशेष कोविड अस्पताल सुरु
येँ – येँ महानगरपालिकाया ग्वाहालिं स्वांया पुन्हि कुन्हु निसेेंं छत्रपाटी निःशुल्क चिकित्सालय विशेष कोभिड अस्पताल कथं संचालनय् वःगु दु । सहरी विकास राज्यमन्त्री रामवीर मानन्धर व येँ महानगरया प्रमुख विद्यासुन्दर शाक्यं बुधवाः छगू ज्याझ्वःया दथुइ अस्पताल सञ्चालन शुभारम्भ यानादीगु खः ।
छत्रपाटी अस्पतालयात कोभिड अस्पताल कथं संचालन यायेगु निंतिं महानगरं पूर्वाधार सुधारया निंतिं एकमुष्ट ३० लाख ३४ हजार ७ सय ५३५ तका व सञ्चालन खर्चवापत् लय् करीब ४८ लाख १६ हजार ६५७ तका बिइगु जूगु दु । थुकिया निंतिं वंगु बैशाख ३१ गते सम्झौता जूगु खः । थ्व सम्झौता महानगरं मेगु निर्णय मयाःतले लागु जुइ ।
महानगरयात भगिनी सहर ल्हासां उपलब्ध याःगु निगः भेन्टिलेटर नं छत्रपाटी चिकित्सालययात लःल्हाये धुंकूगु दु । अथेहे अस्पतालं थप स्वंगः भेन्टिलेटरया ध्यबा नं महानगरं पुलाबीगु जूगु दु ।
अस्पतालया क्षमता अप्वयेकाः कोविड संक्रमणय् लाःपिं विरामीयात सहज उपचारया वातावरण दयेकेत महानगरंं सरकारी व सामुदायिक अस्पताललिसे सहकार्य यानागु खँ कनादिसें महानगर प्रमुख विद्यासुन्दर शाक्यं आः महानगरं जनताया जीवन रक्षाया निंतिं आवश्यक फुक्कं कथंया ज्याय् प्राथमिकता बीगु खँ धयादिल ।
महानगरया प्रमुख प्रशासकीय अधिकृत राजेश्वर ज्ञवालीं पूर्वाधार विकासया लगानी दिकाः महानगरं स्वास्थ्य क्षेत्र सुधारय् अप्वयेकागु खँ धयादिल ।
अस्पतालका अध्यक्ष डा. मनोजमान श्रेष्ठं महानगरपाखें चूलाःगु ग्वाहालिं गुलि फु उलि जनताया सेवा यायेगु व जिमिसं यानागु सेवा सम्बन्धि विवरण न्हियान्हिथं महानगरय् छ्वयेगु खँ धयादिल । थ्व झ्वलय् वय्कलं अक्सिजन व्यवस्थापनय् अझं ग्यानाच्वंगु खँ थुकिया निंतिं अक्सिजन प्लान्ट स्थापना यायेगु योजना दयेकाच्वनागु खँ धयादिल । अस्पतालया निर्देशक डा. प्रेमलकुमार जोशीया कथं अस्पतालय् न्हय्गू आइसीयु, प्यंगू भेन्टिलेटर, खुगू एचडीयूसहित ३५ वेडया कोभिड अस्पताल सञ्चालनय् वःगु खः ।
बैशाख २८ गते महानगरं सरकारी र सामुदायिक अस्पतालया प्रमुख व प्रतिनिधि सःताः कोभिड संक्रमणविरुद्ध ल्वायेत गज्याःगु ग्वाहालि आवश्यक जुइ धकाः न्यनादीगु खः । उबलय् अस्पतालतय्सं थःपिनि क्षमता अप्वयेकेत आवश्यक उपकरण व व्यवस्थापनया लागि ग्वाहालि माग यानादीगु खः । अस्पतालतय् मागकथं थीथी १२ गू अस्पताललिसें सम्झौता जूगु खः ।
महानगरया ग्वाहालिं ८८ गू अक्सिजनसहित २०० वेडया राधास्वामी कोविड आइसोलेसन तथा अक्सिजन थेरापी सेन्टर, नरदेवी आयुर्वेद अस्पतालय् २५ वेडको एचडीयू व २५ वेडया यानाः ५० वेड आइसोलेसन सञ्चालनय् वयेधुंकूगु दु । अथेहे थीथी अस्पतालय् ४२ गू भेन्टिलेटर, ५० गः मोनिटर, १० गः कन्टिन्युअस पोजेटिभ एअर प्रेसर थेरापी मेसिन (सी प्याप), १० गः वाइलेबल पोजेटिभ एअर वे प्रेसर मेसिन (वी—प्याप) उपकरण जडान जुयाच्वंगु दु ।
LEAVE YOUR COMMENTS