लोक सेवाया विज्ञापन प्रतिगामी व असंवैधानिक ः श्रेष्ठ

येँ – समाजवादी पार्टी नेपालया सहअध्यक्ष लोक सेवा आयोगं वंगु जेठ १५ गते गुद्वः स्वयां अप्वः पदया निंतिं याःगु विज्ञापन प्रतिगामी जूगु धासें उकियात खारेज यायेमाःगु माग यानादीगु दु । वय्कलं समानुपातिक समावेशी व्यवस्थाया सन्दर्भय् संविधानया धारा ४२.१ व निजामति सेवासम्बन्धी प्रचलित कानून अःखः आयोगं विज्ञापन याःगु धासें उकियात खारेज यायेत माग यानादीगु खः ।

वय्कलं उगु खँ धनगढीइ पार्टी एकताया लसताय् ग्वसाः ग्वःगु कार्यकर्ता अभिमुखीकरण ज्याझ्वलय् नवासें धयादीगु खः । प्रतिनिधिसभा सदस्य तकं जुयाच्वनादीम्ह श्रेष्ठं संविधानया धारा २४४य् संघ व प्रदेश तहय् लोक सेवा आयोगया व्यवस्था यानातःगु धासें व धारा २२७ य् गाउँपालिका व नगरपालिकाया कर्मचारी भर्ना सम्बन्धी प्रदेश कानूनकथं जुइगु स्पष्ट व्यवस्था यानातःगुलिं कर्मचारी समायोजन ऐनया दफा १२या लिधंसाय् लोक सेवा आयोगं याःगु विज्ञापन असंवैधानिक जूगु दावी यानादिल ।

नेपालय् संघीयता, समानुपातिक व समावेशिता आवश्यक जूगुया मुख्य कारण धइगु हे राज्यपाखें बहिष्करणय् लानाच्वंपिं आदिवासी जनजाति, मधेसी, खस, शिल्पी, थारु, मुस्मां, अल्पसंख्यक व सीमान्तकृत समुदाययात मूलधारय् हयेगु खः धासें स्थानीय सेवा व्यवस्थापनया निंतिं प्रत्येक प्रदेशय् उगु हे प्रदेश दुनेया नागरिक दथुइ प्रतिस्पर्धा जुइकथं प्रचलित समानुपातिक समावेशीताया सिद्धान्तया लिधंसाय् विज्ञापन जुइमाःगु वय्कःया धापू दु ।

प्रधानमन्त्रीं संघीयताया नामय् केन्द्रीकृत शासन यायेत स्वःगु व समाजवादया नामय् सत्ता थःगु ल्हातय् केन्द्रीत यानाः अधिनायकवादी धंगं शासन यायेत स्वःगु द्वपं नं वय्कलं बियादिल । भारतया पश्चिम बंगाल राज्यय् स्वंगू दशक स्वयां अप्वः शासन याःपिं साम्यवादीत पतन जूगु दसु न्ह्यब्वयादिसें ओलीया राज्य नियन्त्रित समाजवाद लागू यायेगु म्हगसं वइगु चुनावय् नेपालय् नं जनतां नेकपायात श्रद्धाञ्जली बीगु ख्याच्वः बियादिल ।

उगु अभिमुखीकरण ज्याझ्वलय् वय्कलं नेपाली कांग्रेसं न्ह्यःने हःगु लोकतान्त्रिक समाजवाद व नेपाल कम्युनिष्ट पार्टी (नेकपां) न्ह्यःने हःगु समाजवाद उन्मुख जनताया जनवादं नेपाःया बहुराष्ट्रियतायात नजरअन्दाज याःगुलिं इपिं तःक्वः तःक्वः सत्ताय् थ्यंसां नं नेपाली समाज विभेदं मुक्त जुइ मफुगु खः धयादिल ।

वय्कलं नेपालय् जातीय मुक्तिया निंतिं संघीयता व वर्गीय मुक्तिया निंतिं समाजवाद आपश्यक जूगु धासें सम्मुनत संघीय समाजवाद नेपाली विशेषतायुक्त समाजवाद जूगु धयादिल ।