मन्त्रिमण्डल पूर्ण जुइवं जसपाय् विद्रोह

येँ -प्रधानमन्त्री शेरबहादुर देउवाया सरकारं मन्त्रिमण्डलयात पूर्णता बीवं जनता समाजवादी पार्टी दुने विद्रोह ब्वलंगु दु । सरकारय् जसपां पर्सा जिल्लाया सुं नं नेतायात मन्त्री मदयेकू धासें पार्टीया कार्यकर्तातय्सं आक्रोश प्वंकूगु खः ।

पर्साया कार्यकर्तातय्सं पर्साया सांसद प्रदीप यादवयात नं मन्त्री दयेकेत माग याना वयाच्वंगु खः तर पार्टी अध्यक्ष उपेन्द्र यादवं प्रदीप यादवयात मन्त्री मदयेकेवं कार्यकर्तात आन्दोलनय् कुहां वःगु खः ।

म्हिगः उमिसं यलया बालकुमारीइ च्वंगु पार्टी ज्याकुथी धर्ना बियाः पार्टी अध्यक्ष उपेन्द्र यादवया पुत्ला समेत च्याकूगु खः । लिसें उमिसं अध्यक्ष यादव विरुद्ध नाराबाजी नं याःगु खः ।

समाजवादी विद्यार्थी युनियनया पर्सा जिल्ला अध्यक्ष राजबाबु राकीं अध्यक्ष उपेन्द्र यादवं पर्साया सुं नं नेतायात मन्त्री मदयेकाः पर्सा जिल्लायात हे धोका बिउगु द्वपं समेत बियादीगु दु । मधेश आन्दोलनया पुसा पीगु ज्या पर्सां याःगु खःसां यादवं पर्सायात हे वेवास्ता याःगु धासें पार्टी कार्यालयय् धर्ना बिउगु खः ।

लुमंकेबहः जू, मन्त्रिमण्डलयात पूर्णता बीवं पार्टी दुने विद्रोह जुइ धइगु सियाः हे जसपां दल विभाजन सम्बन्धी अध्यादेश लित कायेकाः जक सरकारय् वनेगु खँ धया वयाच्वंगु खः ।