भिक्षु तपस्सिधम्मयात अवार्ड

येँ – भिक्षु तपस्सिधम्म महास्थविर ‘बेस्ट सोसियल अवार्ड’पाखें सम्मानित जुयाबिज्याःगु दु । थनया न्हू बानेश्वरय् जूगु छगू ज्याझ्वःया दथुइ वसपोलयात उगु अवार्डपाखें सम्मान याःगु खः ।

बुस्टर मिडियापाखें ग्वसाः ग्वःगु ‘स्वक्वःगु बीएमटीआई बुस्टर इन्टरटेनमेन्ट अवार्ड–२०२१’ ज्याझ्वलय् वसपोलयात ‘बेस्ट सोसियल अवार्ड’पाखें विशेष सम्मान याःगु खः । पुलांम्ह अर्थमन्त्री डा. रामशरण महतं वसपोलयात उगु अवार्ड लःल्हानादीगु खः ।

सामाजिक, व्यापारिक, संकिपा, कलाकारितालिसें थीथी विधाय् योगदान बिउपिंत लःल्हाइगु उगु अवार्ड वसपोलयात कोरोना भाइरस (कोभिड–१९)या संक्रमणया इलय् अत्यावश्यकी हलंज्वलं मजदुर, विपन्न वर्गलिसें गरिबतय् निंतिं याना बिज्याःगु खाद्य सामग्री ग्वाहालिया कदर यासें उगु अवार्ड लःल्हाःगु खः ।

वसपोल भिक्षु तपस्सिधम्मं बौद्ध, धार्मिक व सामाजिक ख्यलय् निःस्वार्थ रुपं सामाजिक ख्यलय् याना वयाच्वनाबिज्याःगु सेवाया उच्च कदरयासें उगु अवार्ड लःल्हाःगु खः ।