तालिबानया सहसंस्थापक नेता बरादर काबुल वइगु

एजेन्सी- तालिबानया सहसंस्थापक नेता मुल्लाह अब्दुल गनी बरादर अफगानिस्तानया राजधानी काबुलय् वइगु जूगु दु । नेता मुल्लाह अब्दुल बुधवाः वा बिहिवाः तकया दुने राजधानी काबुलय् थ्यनीगु खँ अन्तर्राष्ट्रिय सञ्चार माध्यमं धाःगु दु । कतारया दोहाय् च्वनाच्वंम्ह नेता मुल्लाह अब्दुल मंगलवाः कतारं लिहां वयाः अफगानिस्तानया कान्दाहारय् थ्यंकः वःगु खः । कान्दाहार तालिबान जन्म जूगु थाय् खः । कतारय् नेता मुल्लाह अब्दुलं अमेरिकी सेनायात लित यंकेगु निंतिं अमेरिकालिसे वार्ता याःगु खः ।

थ्वया हे दथुइ तालिबानं अफगानिस्तान कब्जा लिपा पत्रकार सम्मेलन नं याःगुु दु । काबुलय् जूगु पत्रकार सम्मेलनय् प्रवक्ता जबिहुल्लाह मुजाहिदं नीदँ लिपा विदेशी सेनायात देसं पितिनाछ्वयाः देय्यात विदेशी पाखें मुक्त यानागु व थ्व गौरवया ई जूगु धाःगु खः ।

सम्मेलनय् प्रवक्ता जबिहुल्लाहं तालिबानत लिसे ल्वाःपिं दक्वसित आममाफी बिइगु, मिस्ततय्त भेदभाव मयायेगु व सांस्कृतिक ढाँचाय् च्वनाः मिडियायात ज्या याके बिइगु धाःगु दु । प्रवक्ता जबिहुल्लाहं थःपिनिगु शासनकाल सुरक्षित जुइगु नं धाःगु दु । सरकार याकनं गठन जुइगु नं प्रवक्ता जबिहुल्लाहं धाःगु दु । प्रवक्ता जबिहुल्लाहं न्हापांखुसी सार्वजनिक रुपं खनेदयेकः वःगु खः ।