४९ म्ह मस्तय्त कोरोना
येँ – सरकारं निषेधाज्ञा छ्वासुकेवं कोरोना संक्रमितया ल्याः न्हियान्हिथं अप्वया वनाच्वंगु दु । म्हिगः जक देय्न्यंकं २२१२ म्ह कोरोना संक्रमण पुष्टि जूगु दु । म्हिगः ८०८८ म्हेसित पीसीआर परीक्षण याःबलय् १७९३ म्ह व ४०१८ म्हेसित एन्टिजेन परीक्षण याःबलय् ४१९ म्ह कोरोना संक्रमण पुष्टि जूगु खँ स्वास्थ्य तथा जनसंख्या मन्त्रालयं धाःगु दु । उकथं हे म्हिगः कोरोना संक्रमणं १८६७ म्ह विरामी मुक्त जूगु दुसा ३३ म्ह विरामी सीगु दु ।
नेपालय् कोरोना संक्रमित जूपिनिगु ल्याः ७ लाख ३२ हजार ६९१ म्ह थ्यंगु दुसा संक्रमण मुक्त जूपिं ६ लाख ८२ हजार ६८२ म्ह थ्यंगु दु । सीपिनिगु ल्याः १० हजार २९२ म्ह थ्यंगु दु । मन्त्रालयया कथं म्हिगः तक देय्न्यंकं ३९ हजार २९८ म्ह सक्रिय संक्रमित दुसा उकी मध्ये ३५ हजार १८ म्ह होम आइसोलेसनय् व ४२८० म्ह संस्थागत आइसोलेसनय् च्वनाच्वंगु दु । कोरोनाया ल्वचं कःपिं मध्ये ७५८ म्ह आईसीयु व १९३ म्ह भेन्टिलेटरय् वासः याकाच्वंगु दु ।
उकथं हे झिदँ स्वयां क्वय्यापिं ४९ म्ह मस्तय्त कोरोना संक्रमण पुष्टि जूगु दुसा ११ दँ निसे २० दँ तकया १३३ म्हेसित कोरोना संक्रमित थपे जूगु दु । म्हिगः नं स्वनिगलय् दकलय् अप्वः संक्रमित लूगु दु । म्हिगः येँ ५२२ म्ह, यलय् १५४ म्ह व ख्वपय् ६३ म्ह संक्रमितत लूगु खः ।
बागमति प्रदेशय् कोरोना भाइरस विरुद्धया पूर्ण रुपं खोप काःपिनिगु ल्याः १० लाख ८२ हजार ३९० थ्यंगु दु । सामाजिक विकार मन्त्रालयया कथं आः तक झिंच्यादँ च्वय्यापिंसं उगु खोप काःगु खः । प्रदेशया झिच्यादँ च्वय्यापिं १९ प्रतिशत जनतां पूर्ण खोप कायेधुंकूगु तथ्यांक दु । मन्त्रालयं सरकारं खोप हयेगु क्रम अप्वया वनेवं कोभिसिल्ड, भेरोसेल मध्ये निगुलिं डोज व जोनसेन खोप काःपिं अप्वःगु खःसा छगू जक डोज काःपिनिगु ल्याः ८ लाख ४७ हजार २०२ थ्यंगु दु ।
LEAVE YOUR COMMENTS