अन्तर्राष्ट्रिय अनलाइन कला ब्वज्या

येँ – विश्वया थीथी झिंन्हय्गू देय्या कलाकारतय् अनलाइनया माध्यमं कला ब्वज्या जूगु दु । कोरोनाया कारणं कला गतिविधि नं ठप्प जुयाच्वंगु अवस्थाय् उकथं विश्वया थीथी देय्या कलाकारतय् भर्चुअल माध्यमं कला ब्वज्या जूगु खः ।

कला समूह आर्ट बुम, आर्ट नेपाल व आकार नांया स्वंगू संस्थाया ग्वसालय् जूगु कला ब्वज्याय् विश्वया थीथी १७ गू देय्या चय्प्यम्ह कलाकारं थःथःगु कला भुर्चअल माध्यमं ब्वज्या याःगु खः ।

कोरोना संक्रमणया कारणं मेमेगु ख्यःथें कला गतिविधि नं शुन्य जुयाच्वंगु इलय् विश्वया कलाकारतय् दथुइ सौहार्दता कायम यायेगु उद्देश्यं उकथं कला ब्वज्या याःगु खः ।
‘निक्वःगु अन्तर्राष्ट्रिय अनलाइन आर्ट एक्जिविसन–२०२१’या नामं जूगु ब्वज्याय् विश्वया १७ गू देय्या चय्प्यम्ह कलाकारं ब्वति काःगु खः । ब्वज्याय् नेपाःया ख्वीप्यम्ह कलाकारया सहभागिता दुगु खः । ब्वज्याय् सहभागि कलाकारतय्सं थःपिंसं तयार यानातःगु समसामयिक विषयय् कला ब्वज्या याःगु खः ।

अनलाइन कला ब्वज्याय् नेपाःया नांजाःपिं वरिष्ठ कलाकार किरण मानन्धर, कृष्ण मानन्धर, सुष्मा राजभण्डारी, मदन चित्रकार, राधेश्याम मुल्मी, जीवन राजोपाध्याय, उमाशंकर शाह, मोतिराम महर्जन, गोविन्द डंगोल, रमेश खनाललिसें मनरा प्रजापति थेंज्याःपिं न्हूपिं कलाकारया सहभागिता दुगु खः । भारत, अस्ट्रिया, इक्वेडर, अमेरिका लगायतया देय्या कलाकारतय् सहभागिता दुगु ब्वज्याया संयोजन कलाकार रत्न शाक्यं यानादीगु खः ।

कोरोनाया कारणं कला ख्यःया गतिविधि ठप्प जुयाच्वंगु इलय् थुकियात चलायमान यानाः कलाकारतय् दथुइ कलात्मक वातावरण दयेकाः सम्बन्धयात अझ क्वातुका यंकेगु ल्याखं थुकथंया ज्याझ्वः यानागु संयोजक शाक्यं कनादिल ।

वय्कःया कथं थगुने न्हापांखुसी लकडाउन जूगु इलय् नं न्हापांगु संस्करणया भर्चुअल माध्यमया कला ब्वज्या यानागु वय्कलं कनादिल ।