स्वंगू विधेयकयात नागरिक समाजया विरोध

येँ – नागरिक समाजया न्ह्यलुवापिंसं सरकारं संघीय संसदय् दर्ता याःगु स्वंगू विधेयक प्रति आपत्ति प्वंकुसें उकियात तत्काल लित कायेत सरकारयात इनाप याःगु दु । राष्ट्रिय मानवअधिकार ऐन–२०६८ या संशोधन यायेत दयेकूगु विधेयक २०७५, मिडिया काउन्सिल सम्बन्धी विधेयक–२०७५ व सामाजिक संघसंस्था ऐन–२०७५ या सन्दर्भय् मंकाः नागरिक अभियानपाखें म्हिगः ग्वसाः ग्वःगु नागरिक संवाद ज्याझ्वलय् न्ववासें वक्तातय्सं संविधानया प्रावधान, व्यवस्था व भावनया प्रतिकूल जुइ कथं विधेयक वःगुलिं उकियात तत्काल लित कायेगु सरकारयात इनाप याःगु दु ।

संघीय संसदय् दर्ता जूगु विधेयकय् सुयागुं मर्यादा वा प्रतिष्ठाय् आँच वइगु खनेदत धाःसा काउन्सिलं सम्बन्धित आमसञ्चार माध्यम, प्रकाशन, सम्पादक, पत्रकार वा संवाददातायात नीन्याद्वः निसें झिगू लाख तका तक जरिवाना यायेफइ धयातःगु दु ।

विधेयकय् काउन्सिलपाखें जारी जूगु आचार संहिता अःखः गुगुं नं कथंया सामग्री प्रकाशन वा प्रसारण याःगु कारणं व्यक्ति वा संस्थायात क्षति जूगु जूसा काउन्सिलं अज्याःगु क्षति जूगु व्यक्ति वा संस्थायात मनासिव क्षतिपूर्र्ति कया बी फइ धकाः न्ह्यथनातःगु दु । मिडिया काउन्सिल सम्बन्धी विधेयकं सञ्चार क्षेत्रय् अंकुश तयेफइ धासें नेपाल पत्रकार महासंघ आन्दोलन याना वयाच्वंगु दु ।