निश्चित क्षेत्रय् सिल यायेमाःगु अवस्था वयेफु

येँ (नेपालभाषा टाइम्स) – कोरोना भाइरसया परीक्षण म्हो जूगुलिं जक संक्रमिततय् ल्याः नं म्हो खनेदुगु खँ उपत्यका मेयर फोरमया सचिव लिसें थिमि नगरपालिकाया मेयर मदनसुन्दर श्रेष्ठं धयादीगु दु । नेवाः पत्रकार दबूपाखें न्ह्याका वयाच्वंगु सचेतना ज्याझ्वलय् खँ ल्हायेगु झ्वलय् वय्कलं थ्व खँ धयादीगु खः ।

वय्कलं धयादीगु दु, ‘पिसीआर परीक्षण हे म्हो जूगुलिं संक्रमिततय् ल्याः नं म्हो खनेदुगु खः । थौंकन्हय् स्वनिगलय् मृत्युदर धाःसा अप्वया वनाच्वंगु दु, थुकिं नं क्यं स्वनिगलय् समुदायस्तरय् कोरोना भाइरस संक्रमण न्यना वनेधुंकूगु दु ।’ कोरोना संक्रमणया कारणं स्वनिगलय् जक ५९३ म्ह सीधुंकूगु दु। गुकी येँय् ३८६म्ह, यल ११४ म्ह, व ख्वपय् ९३ म्ह सीगु दु ।

वय्कलं स्वनिगलय् कोरोना संक्रमितत अझं यक्व दनिगुलिं निश्चित ई तयाः कोरोनाया ‘चेन ब्रेक’ याये हथाय् जुइधुंकूगु बिचाः नं तयादीगु खः । खँल्हाबल्हाय् मेयर श्रेष्ठं १४ निसेँ २१ दिन तकया निषेधाज्ञा लागू जुल धाःसा हटस्पट जुयाच्वंगु स्वनिगलय् कोरोनाया महामारी भयावह म्हो याये फइगु धारणा तयादिसें धयादिल, ‘उपत्यका नगरपालिका फोरमपाखें वैज्ञानिक तर्कसहित थ्व प्रस्ताव तयागु खः । महिनौं लकडाउन यायेगु मखु । छवाः निवाः जक निषेधाज्ञा तल धाःसा चेन ब्रेक जुइ, अले भयावह स्थिति वइमखु धयागु सल्लाह कथं जिमिसं सिसिएमसीइ प्रस्ताव तयागु खः ।’

मेयर श्रेष्ठया कथं मोहनि, स्वन्ति व छठ पर्व लिपा संक्रमण झन् अप्वइगु ग्याःचिकु दुगुलिं उपत्यका नगरपालिका फोरमं लकडाउनया सल्लाह बिउगु खः । थःपिनिगु सल्लाहय् प्रधानमन्त्री, गृहमन्त्री व स्वास्थ्यमन्त्री नं सकारात्मक दुसां लकडाउन यायेगुली सहमति मबिउगु खँ न्ह्यथँसें संक्रमित अप्वया हे वन धाःसा निश्चित क्षेत्रय् सिल यायेगु अवस्था वयेफुगु खँ धयादीगु दु ।

‘नियन्त्रणया नितिं छठ पर्व सिधःगु २१ न्हु तक पियाः स्वयेगु खँ दु । स्थिति बांमलाना वन धाःसा थप पलाः न्ह्याकेगु सहमति जुगु दु,’ वय्कलं धयादिल । तराईले नो टेस्ट नो केसया स्थिति दु । अनं स्वनिगलय् दुहां वइबलय् स्थिति झन् भयावह जुइफु। उकिं नं स्वनिगलय् कडाई याये हथाय् जुइधुंकूगु धापू मेयर श्रेष्ठया दु । वय्कलं आवश्यक जुल धाःसा नाकाय् सिल यायेमाःगु खँ नं धयादीगु दु ।

सम्बन्धित बुखँ

LEAVE YOUR COMMENTS