राष्ट्रिय स्तरया एसइई परीक्षा पूवंक दिकेगु तयारी

येँ (नेपालभाषा टाइम्स) – सरकारं आः एसईई परीक्षा न्ह्याब्लेंया निंतिं बन्द यायेगु कथं तयारी सुरु याःगु दु। थुकिया निंतिं सरकारं माध्यमिक शिक्षा परीक्षा धाइगु एसइईया कानुनी व्यवस्था हे हिलेत्यंगु दु ।

कोरोना भाइरस न्यनेफुगु खतराया कारणं थुगुसी एसइई परीक्षा स्थगित यायेधुंकूगु सरकारं आः न्ह्याबलेंया निंतिं हे बन्द यायेत्यंगु खः । थुगुसी शिक्षा मन्त्रालयया सिफारिसय् मन्त्रिपरिषदं वंगु जेठ २८ गते २०७६ सालया एसइई परीक्षा मकासे आन्तरिक मूल्यांकनया आधारय् ग्रेडिङ यायेगु निर्णय याःगु खः । आः थुकियात संरचनागत रुपं हे विकास यायेत कानुनय् हे हिउपाः हयेमाःगु आवश्यक दुगुलिं कानून हे संशोधन यायेगु तयारी याःगु खः । कानुन संशोधन जुल धाःसा माध्यमिक तहया राष्ट्रिय स्तरया परीक्षा कक्षा १२या जक कायम जुइ ।

देशय् संघीयता वयेधुंकाः माध्यमिक शिक्षा धकाः कक्षा ९ निसें १२ तकयात हे काये धुंकूगु दु। थ्व अवस्थाय् १० कक्षाय् राष्ट्रिय स्तरं परीक्षा कायेम्वाःगु शिक्षाविद्तय्सं धया वयाच्वंगु खः ।

सरकारं धाःसा संघीय शिक्षा ऐन जारी मजूनिगु व बोर्डया प्रदेशस्तरय् संरचना नं तयार मजूनि धासें कक्षा १० या एसइई परीक्षा राष्ट्रिय स्तरं हे संचालन याना वयाच्वंगु खः । मेखे प्रतिनिधि सभाया शिक्षा तथा स्वास्थ्य समितिं धाःसा १० कक्षाया परीक्षायात राष्ट्रियस्तरयं मकायेगु निंतिं प्रबन्ध यायेत सरकारयात न्हापा हे निर्देशन बियातयेधुंकूगु दु ।

शिक्षा मन्त्री गिरिराजमणि पाखरेलं संघीयता कथं शिक्षा ऐन तर्जुमा यायेत कानुन,न्याय तथा संसदीय मामिला मन्त्रालयय् सहलह जुयाच्वंगु धासें थ्व ऐन पारित जुल धायेवं माध्यमिक शिक्षाया कक्षा १० या अन्तिम परीक्षा सम्बन्धय् दीर्घकालिन रुपं न्हूगु व्यवस्थापन जुइगु खँ राससयात कनादीगु दु ।

शिक्षा तथा मानव स्रोत विकास केन्द्रया निर्दे शक गेहनाथ गौतमं विद्यालय तहया अन्त्यय् काइगु परीक्षा कक्षा १२ यात हे उपयुक्त नां बियाः राष्ट्रिय परीक्षा बोर्डया केन्द्रीय तहया व्यवस्थापन, संचालन व प्रमाणिकरण यायेगु व आः प्रचलनय् वयाच्वंगु कक्षा १०या एसइई परीक्षायात थ्व हे नामं प्रदेश तहया व्यवस्थापन, संचालन व प्रमाणिकरण याःसा उपयुक्त जुइगु खँ धयादीगु दु ।

शिक्षा ऐन (२०२८)या च्याक्वःगु संशोधनय् ‘माध्यमिक शिक्षाया कक्षा १० व माध्यमिक तहया अन्त्यय् जुइगु परीक्षा बोर्डपाखें संचालन जुइगु, तर आधारभूत तहया परीक्षा जिल्ला शिक्षा कार्यालयं संचालन यायेगु’ धकाः न्ह्यथनातःगु दु ।

शिक्षा अधिकारकर्मी व लुनिभाः बाल सरोकार समूहया कार्यकारी निर्देशक नरेन्द्र डंगोलं माध्यमिक शिक्षाया अन्तिम परीक्षा कक्षा १२यात मान्यता बियातःगुलिं कक्षा १०या एसइई परीक्षा राष्ट्रिय स्तरं यायेबल् विद्यार्थीतय्के परीक्षाया कारणं मनोवैज्ञानिकत त्रास दयाच्वनीगु खँ धयादिल ।