खड्गी समुदाययात कयाः सरकारयात सर्वोच्चया आदेश

येँ – सर्वोच्चा अदालतं खड्गी समुदायया विषययात कयाः सरकारयात निर्देशनात्मक आदेश बिउगु दु । सर्वोच्चं हालय् जक खड्गी समुदायया आत्मसम्मानय् घाः मलाइकथं थर कायम यायेत धासें सरकारयात निर्देशनात्मक आदेश बिउगु खः ।

नेपाल खड्गी सेवा समितिया संरक्षक मनोज नेवाः खड्गीं दायर यानादीगु रिटयात कयाः सर्वोच्चं सरकारया नामय् उकथंया आदेश बिउगु खः । संरक्षक खड्गीं दायर यानादीगु रिटय् सर्वोच्चं थनिं दत्या न्ह्यः २०७६ चैत महिनाय् हे थुकथंया निर्देशनात्मक आदेश बिउगु खः ।

अबलय् निर्देशनात्मक आदेश जारी याःगु सर्वोच्चं हालय् जक उकिया पूर्ण पाठ जारी याःगु खः । सर्वोच्चं हालय् जारी याःगु पूर्ण पाठय् नेपाःया संविधानं बियातःगु सम्मानपूर्वक म्वाये दइगु हकया नं व्याख्या यानातःगु दु ।

खड्गी समुदायं नागरिकता, सवारी चालक अनुमतिपत्र, शैक्षिक प्रमाण पत्र, पासपोर्ट, जग्गाधनी प्रमाणपुर्जा थेंज्याःगु राज्यपाखें बीगु सरकारी प्रमाणिक भ्वंतय् थःपिनिगु आत्म सम्मानबोध जुइकथं नायः, सिंह, शाही, खड्गी कायम यायेमाःगु माग याःगु खः । उगु मागयात कयाः सर्वोच्चं आवश्यक कानूनीलिसें व्यवस्थपकीय व्यवस्था यायेत आदेश जारी याःगु खः ।

नेपाल सरकार, प्रधानमन्त्रीलिसें मन्त्रिपरिषद्या ज्याकू, गृह, भूमिसुधार, शिक्षा मन्त्रालयलिसें परीक्षा नियन्त्रण ज्याकू, उच्च माध्यमिक शिक्षा परिषदे लगायतया विपक्षी दयेकाः रिट निवेदन दायर याःगु खः ।